Kezdesý barysynda Kazakh Invest basqarma tóraǵasy Saparbek Tuıaqbaev Qazaqstan men Qytaı arasyndaǵy birlesken ınvestısııalyq baǵdarlama aıasynda bıotehnologııalar, avtokólik klasteri, jańartylǵan energııa kózderi salalaryndaǵy iri joǵary tehnologııaly jobalardy iske asyrý bastalǵanyn atap ótti. Sondaı-aq, taǵy da basqa kelisimderge Elbasy N. Á. Nazarbaevtyń bıylǵy maýsym aıyndaǵy QHR-ǵa sapary barysynda qol jetkizildi.
«Toqyma ónerkásibi – yntymaqtastyqty arttyratyn úlken áleýeti bar, keleshekti baǵyt. Máselen, Qazaqstanda jyl saıyn 250 myń tonnaǵa jýyq maqta jınalady. Osy kólemniń shamamen úshten bir bóligi óńdeledi, al qalǵan bóligi shıkizat túrinde eksportqa baǵyttalady. Sonymen qatar, bizde О́zbekstanmen shekara mańynda ornalasqan “Ońtústik” arnaıy ekonomıkalyq aımaǵy bar. Halyqaralyq reıtıngterge sáıkes Qazaqstandaǵy ınvestısııalyq ahýaldyń Ortalyq Azııa aımaǵyndaǵy eń jaqsysy ekenin eskersek, QR-daǵy bıznesti dóńgeletip, eksportty odan ári damytýǵa ábden bolady», — dedi S. Tuıaqbaev.
О́z kezeginde «Ońtústik» AEA-nyń basshysy Medeý Dildábaev qytaılyq seriktesterge arnaıy ekonomıkalyq aımaq qatysýshylaryna qarastyrylǵan jeńildikter týraly egjeı-tegjeıli aıtyp berdi.
Qytaıdyń Toqyma ónerkásibi odaǵy sol eldiń jetekshi uıymdarynyń biri. QHR-dyń Toqyma ónerkásibi mınıstrliginiń quramynan shyqqan Odaqtyń 20 jyldan astam tarıhy bar. Qazir uıymnyń qatarynda 20 mln-nan astam adam jumys isteıdi. Odaqtyń kompanııalary Qytaıdyń búkil toqyma ónerkásibiniń jalpy eksport kóleminiń 12%-yn eksporttaıdy, al Qytaı ekonomıkasyna qosqan úlesi 3%-ǵa baǵalanady.
Kezdesý barysynda toqyma ónerkásibi delegasııasynyń músheleri maqta óndirý, shıkizatty qaıta óńdeý, kıim óndirisi jáne logıstıka salasyndaǵy yntymaqtastyq týraly kelissózder júrgize bastady.
«Bul bizdiń Qazaqstanǵa alǵashqy saparymyz jáne bizdiń delegasııa músheleriniń kópshiligi sizdiń elmen yntymaqtastyqty damytýǵa múddeli. Munda Kazakh Invest kompanııasynyń shaqyrýymen keldik. Menińshe, bizde óte sátti kezdesý boldy, Qazaqstannyń ınvestısııalyq áleýeti týraly bildik. Qazaqstan men Qytaı – ortaq taýlar men ózender arqyly baılanystyrylǵan, ortaq shekarasy bar el, sondyqtan da osy sala boıynsha eki el arasynda úlken múmkindikter baryna senemin», — dedi Qytaı delegasııasynyń basshysy, Qytaı Toqyma ónerkásibi odaǵynyń tóraǵasy Sýn Jýıchje.
О́z kezeginde Qazaqstan Respýblıkasyndaǵy Qytaı Halyqaralyq Saýda Palatasy ókildiginiń bas dırektorynyń orynbasary Gao Sı «búgingi kezdesý Qytaı men Qazaqstan arasyndaǵy toqyma ónerkásibi yntymaqtastyǵy úshin jaqsy bastama boldy. Úkimet ınvestorlar úshin óte qolaıly jaǵdaı jasap jatyr. Sondyqtan búgingi kelissózder men talqylaýlardan keıin jaqsy nátıje bolady dep oılaımyn» dep atap ótti.
