Aqtaýda ótetin Kaspıı mańy memleketteri basshylarynyń sammıtinde Kaspıı teńiziniń quqyqtyq mártebesi týraly konvensııaǵa qol qoıylady. Qujat teńiz akvatorııasyn, Kaspıı teńizi túbin bólýge, bıoresýrstardy qorǵaýǵa, balyq aýlaýǵa, sonymen qatar Kaspıı túbimen qubyr tartýǵa qatysty erejelerdi qamtıdy.
11 tamyz kúni Quryq portyndaǵy mýltımodaldyq kólik habyn tanystyrý sharasynda QR Prezıdenti 12 tamyzda ótetin Aqtaý sammıtinde tarıhı sheshim qabyldanatynyn aıtqan edi.
«Erteń Aqtaýda Kaspıı mańy memleketteri basshylarynyń besinshi sammıti ashylady. Sońǵy 20 jylda Kaspıı teńizinde ortaq jumystarymyzdyń barlyq máselelerin sheshý úshin ustanymdarymyzdy kelisýge talpyndyq, kúrdeli kelissózder júrgizdik. Bul turǵyda keme qatynasy, resýrstar, bıologııalyq resýrstardy qorǵaý jáne memleketterdiń saýda yntymaqtastyǵy sekildi taqyryptar nazarda boldy. Búginde barlyq máseleler boıynsha ýaǵdalastyqqa qol jetkizildi dep aıta alamyn. Erteń tarıhı sheshimniń qabyldanýyn kútip otyrmyz. Bul óte mańyzdy», - dedi Memleket basshysy.
