Belgili bir ǵylymı ınstıtýttyń belgili dırektory, dálirek aıtsaq, aty-jóni elge máshhúr akademık kúnderdiń bir kúninde qol astyndaǵy qyzmetkerleriniń birin kabınetine shaqyryp alyp, bylaı dedi:
– Bizdiń ınstıtýtqa álgi aptasyna bir ret shyǵatyn gazet bir mańyzdy tapsyrys berip edi. Sony búgin, qalqam, saǵan júktegeli otyrmyn. Oılanyp, tolǵanyp, izdenip osy taqyrypqa qalaıda bir ǵylymı maqala jazyp shyǵýyń qajet. Tek áıteýir, aıanyp qalma. Boıyńdaǵy bar bilimińdi, kúsh-jigerińdi sal. Seniń elge tanylyp, kózge kórinetin keziń mine, osy!
Hosh, sonymen, apta ótti, aı ótti. Jas ǵalym mıyndaǵy, boıyndaǵy bar bilimi men kúsh-jigerin jumsap, kúndiz-túni izdenip, eńbektenip, kúnderdiń bir kúninde álgi ǵylymı maqalany bitirip, akademıkke alyp keldi.
Ol ony oqyp shyǵyp, ári oılandy, beri oılandy. Basyn shaıqady. Qasyn kerdi. Ernin jymqyrdy. Kózin jumdy. Bir sózben aıtqanda, unatty. Jáne jaı unatyp qana qoıǵan joq, ishteı qatty súısindi. Qýandy. Qyzyqty. Tipti, qyzǵandy deýge de bolady.
– Iá-á, – dedi bir kezde daýsyn sozyp. – Jalpy, jaman emes. Biraq redaksııadaǵylar bul maqalada qalaıda meniń aty-jónimniń turǵanyn qalaıdy ǵoı. О́ıtkeni men ıdeıanyń avtorymyn ári álemge áıgili akademıkpin. Sondyqtan soavtor bolsaq qaıtedi?
– O-o, – dedi ańqaý ári albyrt jas ǵalym akademıkke tańdana qarap. – Meniń famılııam sizdiń famılııańyzben birge tursa, ol men úshin baqyt emes pe!
– Árıne, – dedi akademık aqyryn ǵana basyn shulǵyp. – Baqyt!
Sóıtti de, maqala avtorynyń aty-jóni jazylǵan tusqa mánerlep turyp óz famılııasyn jazyp qoıdy.
Áıtse de, áldenege kóńili tolmaǵandaı taǵy da qabaǵyn túıip, basyn shaıqap:
– Áı, biraq ondaǵylar muny túsinedi ǵoı deımisiń? Joq. Túsinbeıdi. Sondyqtan óz betterinshe shımaılap, qysqartyp, ábden berekesin ketiredi... Bilem ǵoı olardy. Bilem. Degenmen, jiberip kóreıik osylaı...
Arada kóp ótpeı-aq álgi ǵylymı maqala gazetke jarq etip shyǵa keldi. Ony akademık kúni buryn bilip otyrdy. Sebebi gazetke qol qoıatyn bas redaktordyń ózi telefon shalyp, quttyqtap, taǵy da osylaı jazyp tursańyzshy dep ótinish jasady.
Al erteńine akademık ınstıtýtqa kelgen poshtany ádettegisinshe eń birinshi ózi qarap shyǵatyn daǵdysymen álgi gazetke bir kóz júgirtip ótti de, qaramaǵyndaǵy qyzmetkerine ishki qyzmettik telefon arqyly habarlasty.
– Kórdiń be? – dedi samarqaý ǵana ún qatyp.
– Joq.
– О́tkendegi maqala búgin shyǵypty ǵoı, áıteýir. Biraq men aıtqandaı ábden qysqartypty... Basqasyn qoıshy, eń ókinishtisi, meniń famılııamnyń astyńǵy jaǵynda turǵan seniń famılııań da qysqaryp ketipti.
– A-a...
Jas ǵalym ań-tań boldy. Túski úzilis kezinde júgirip baryp kóshedegi dúńgirshikten ala salyp qarap edi, gazet ustaǵan qoly dirildep ketti. Sebebi eki betti tutas alyp jatqan etekteı maqaladaǵy qysqaryp ketken jalǵyz mátin onyń óziniń aty-jóni ǵana eken.
Bul qalaı bolǵany, á?!
Nurǵalı ORAZ,
«Egemen Qazaqstan»
