Oblystyq kásipkerler palatasy dırektorynyń aıtýynsha, shaǵyn ındýstrııalyq aýmaq aıasynda kásipkerlerge daıyn óndiristik ǵımarat pen tolyq ınfraqurylymy bar keńse bólmeleri usynylady. Munyń bárine jeńildik jasalǵan. Eger kásipker óz ofısin, tigin sehyn, naýbaıhanasyn, avtoservısi men ózge de isin ashqysy kelse, shaǵyn ındýstrııalyq aýmaq bıznesti damytý úshin barynsha ońtaıly múmkindik. Bul aýmaq qala shetindegi «Kókshetaý – Astana» kúre jolynyń boıynda ornalasqan. Jalpy alań 3,5 gektardy, ǵımarattyń aýmaǵy 4 myń sharshy metrdi quraıdy. Shaǵyn ındýstrııalyq aýmaqta damyǵan ınfraqurylym, temir jol men kireberis jol bar.
– Shaǵyn bıznes ókilderiniń seh pen óndiristik ǵımarat salýǵa múmkindikteri joq. Olar bul nysandardy úlken kásiporyndardan jalǵa alyp, qolyndaǵy qarjysyn qazirgi zamanǵy qondyrǵylar satyp alýǵa jumsaıdy. Sóıtip bul qolaıly jaǵdaı shaǵyn bıznestiń damýyna kóp yqpalyn tıgizedi, dedi T.Naqypbekov.
Shaǵyn ındýstrııalyq aýmaqtyń qatysýshylary oblystyq kásipkerler palatasynan keńestik-quqyqtyq kómek, bıznes-ınkýbator aıasynda kásipkerlikke oqý, ónimdi satýǵa kómek, jobalardy marketıngtik zertteý, aqparattyq jáne saraptamalyq resýrstarǵa qol jetkizý tárizdi qyzmettiń barlyq túrin ala alady. Bul jobanyń ereksheligi, damyǵan ınfraqurylymy bar daıyn bólmeniń barlyǵynda bolyp otyr. Munyń bári kásipkerlerdi ýaqyt pen qarjy shyǵyndaýdan bosatady.
Baıqal BAIÁDIL,
«Egemen Qazaqstan»
Aqmola oblysy
