Bilim berý salasyndaǵy jańalyqtar týraly Astana qalasynyń Bilim basqarmasynyń basshysy Anýar Janǵozın tamyz konferensııasynda málimdedi.
«Jańa oqý jylynda ata-analardan túsken ıdeıany qoldaı otyryp, Astanada jańashyl synyptardy ashý kózdelip otyr. Joba memlekettik tildi damytýǵa baǵyttalǵan. Negizgi ıdeıasy orys tilinde bilim alatyn synyptardy kezeń-kezeńmen memlekettik tildegi synyptarǵa aınaldyrý. Is júzinde birinshi synypqa keletin balalar sabaq barysynda aqparatty bastapqy qadamda 70 paıyzyn orys tilinde, al 30 paıyzyn qazaq tilinde oqıtyn bolsa, 5-synypqa barǵanda oqytý tili tolyǵymen memlekettik tilge kóshiriletin bolady», dedi Anýar Janǵozın.
Mundaı jańashyl synyptar Astana ákiminiń tapsyrmasynyń negizinde №60 mektep-lıseıinde ashylady. Sondaı-aq, qyzdarǵa arnalǵan «Bilim ınnovasııa» lıseıine de jańa júıe engiziletin bolady.
«Jalpy, Astana qalasy birinshi bolyp barlyq pılottyq jobalarǵa qatysady. Bizdiń ustazdar árbir ózgerister men jańashyldyqqa tez beıimdeledi. Osy jyly elordalyq bilim ordalarynda júzege asyrylatyn birneshe pılottyq jobalar bar. Mysaly, elektrondyq oqýlyqtardy paıdalaný eki mektepke engiziledi. Astananyń 5 mektebi men 3 kolledji pılottyq reıjımde latyn álipbıine kóshiriledi», dedi ol.
