Kúmiske qol jetkizdik

Toptyq týrnırde jerles­terimiz buǵan deıingi álem birin­shi­liginde júlde alǵan Chehııa jáne Belarýs quramalarymen kezdesti. Alǵashqylaryn uttyq (4:3), ekinshisimen teń tústik (1:1). Sonyń arasynda Jańa Zelandııany jeńdik (2:0). Osylaısha, «V» tobynda kósh bastap, pleı-off kezeńine óttik. Shırek fınalda Argentınadan aılamyzdy asyrsaq (6:2), jartylaı fınalda Portýgalııadan basym tústik (3:2). О́kinishke qaraı, fınalda álemniń tórt dúrkin chempıony degen dardaı ataǵy bar Reseı quramasyna álimiz jetpedi (2:4). Úshinshi orynǵa Ýkraına fýtzalshylary taban tiredi.

Osy oıynnan keıin, «Almaty Arenada» chempıonattyń saltanatty jabylý rásimi ótti. Onyń barysynda arnaıy kelgen qonaqtar osy chempıonattyń uıymdastyrýshylaryna keremet qoldaý kórsetkeni úshin alǵys bildirip, artynsha Almaty qalasy ákiminiń orynbasary Arman Qyryqbaev FISÝ týyn kelesi álem chempıona­tyn qabyldaıtyn Polsha ókili­ne tapsyrdy. Sonymen qatar júlde alǵan komandalardyń barlyǵy da kýbok jáne medalmen marapattalyp, úzdik oıynshylar túrli atalymdar boıynsha arnaıy syılyqtarǵa ıe boldy. Olardyń qatarynda qazaqstandyq Birjan Orazov – úzdik qorǵaýshy, al Dáýren Tursaǵulov úzdik shaýbylshy atandy.

Sóıtip Almatyda ótken jarysta Qazaqstannyń stýdentteri óz tarıhynda tuńǵysh ret álem birinshiliginiń jeńis tuǵyryna kóterildi. Al Reseı bolsa, besinshi márte bas júldeni oljalap otyr. Bul kórsetkish jaǵynan olar Brazılııamen teńesti. Ońtústik Amerıkanyń oǵlandary 1984, 1996, 2000, 2010, 2016 jyldary aldaryna jan salmasa, reseılikter 1994, 2002, 2006, 2014, 2018 jyldary qarsylas shaq keltirmedi. Sondaı-aq Ýkraına úsh márte (1998, 2004, 2012), al Ispanııa (1990), Italııa (1992) jáne Portýgalııa (2008) bir-bir retten jeńis tuǵyrynyń eń bıik satysyna kóterildi.

Áıelder arasynda ótken jarysta da Reseı altynnan alqa taǵyndy. Ekinshi jáne úshin­shi oryndarda – Ýkraına men Por­týgalııa. Qazaqstannyń qyz­dary aıtýly dodada qalyń toptyń arasynda qalyp qoıyp, el senimin aqtaı almady. Esterińizge sala keteıik, 2008-2016 jyldar ara­lyǵynda uıymdastyrylǵan bes dúnıejúzilik dodanyń bar­lyǵy da Brazılııa arý­lary­nyń aıqyn jeńisimen aıaqtal­ǵan edi. Alaıda Almatyǵa brazı­lııalyqtar kelmedi. Sol sátti utymdy paıdalanǵan reseılik­ter alǵash ret altyn tuǵyrdan qol bulǵady. Al oǵan deıin olar álem birinshiliginde bir altyn jáne qos qola medaldi ıelengen bolatyn.

Ǵalym SÚLEIMEN,

«Egemen Qazaqstan»

 ALMATY