Bul Qazaqstandaǵy teńiz munaıgaz kenoryndaryn ıgerýdiń alǵashqy iri jobasy. Merekeni atap ótý aıasynda Atyraýda «Qashaǵan- Qazaqstannyń bolashaǵy úshin» ǵylymı-tájirıbelik konferensııasy ótkizildi. NCOC basshylyǵy men konsorsıým ujymy, Qashaǵan kenornyn alǵash ashqan ardagerlerdiń aldynda Atyraý oblysynyń ákimi Nurlan Noǵaev sóz sóıledi. Jobanyń mańyzdylyǵyna toqtala otyryp, oblys ákimi Memleket Basshysy Nursultan Nazarbaevtyń quttyqtaýyn oqydy.
«Bul joba Qazaqstannyń munaıgaz salasy úshin eń iri jáne mańyzdy jobalardyń birine aınaldy. Táýelsizdiktiń alǵashqy jyldarynda jas memleketimiz úshin Kaspıı qaırańyndaǵy iri Qashaǵan kenornyn ıgerý aıyryqsha oqıǵa boldy. Jobany iske asyrý Qazaqstanǵa sheteldik ınvestısııalardy, jańa tehnologııalardy, kúrdeli teńiz kenoryndaryn ıgerýdegi álemdik tájirıbeni tartýǵa múmkindik berdi. Bul osy jobaǵa barlyq qatysýshylardyń úlken eńbegi. Bul jumys alǵa qaraı da elimizdiń ekonomıkasy men energetıkalyq qaýipsizdigi úshin paıda ákeledi dep senemin», - delingen Nursultan Nazarbaevtyń quttyqtaýynda.
Oblys ákimi Soltústik Kaspıı jobasy búgingi kúni elimizdiń ekonomıkasyna aıtarlyqtaı yqpalyn tıgizip otyrǵan Qashaǵan jobasy ǵana emes ekenin atap ótti.
- Bul ıgerý kútilip otyrǵan basqa da kenoryndary. Men búgingi ujymnyń aldaryna qoıǵan mindetterdi tolyq oryndaıtynyna senemin. Az jumys atqarylǵan joq, alaıda alda áli de atqarylatyn jumystar kóp. «Nóldik sıkl», qorshaǵan ortaǵa uqyppen qaraý, qaýipsizdik tehnıkasynyń máseleleri – bul jobanyń basynda turǵan ózekti mindetter jáne kúni búginge deıin ómirlik mańyzdy máseleler bolyp tabylady. Olardy sheshý úshin álemdik munaı salasynyń barlyq tájirıbesi men áleýetin paıdalaný qajet, dep atap kórsetti Nurlan Noǵaev.
Qashaǵan jobasyn iske asyrý eki – Atyraý jáne Mańǵystaý oblystarynyń aýmaǵynda júrgizilýde. Mańǵystaý oblysynyń ákimi Eraly Toǵjanov atap ótkendeı, konsorsıýmnyń iri áleýmettik jobalardy iske asyrýdaǵy úlesi aıtarlyqtaı.
- Bul prezıdentimizdiń jobasy, elimizdiń, táýelsiz Qazaqstannyń damýyna qýatty serpin beretin iri joba. Men jaqynda Aqtaý qalasynda ótken Kaspıı mańy memleketteri basshylarynyń qatysýymen ótken iri sammıtke belsene qatysqany úshin konsorsıým basshylyǵyna alǵys bildirgim keledi. Kaspıı teńiziniń quqyqtyq mártebesi naqty belgilenip, qol qoıyldy. Bul tarıhı oqıǵa. Sammıtti ótkizýge sizdiń konsorsıýmnyń qosqan úlesi mol, dedi Eraly Toǵjanov.
NCOC konsorsıýmynyń basqarýshy dırektory Brýno Jarden Kaspııdegi kenoryndaryn iske asyrý jónindegi bolashaqtaǵy jobalar týraly aıtyp berdi. Jobanyń ekonomıkalyq mańyzdylyǵyn aıtarlyqtaı arttyratyn perspektıvalyq kenoryndar bar. Jobanyń tarıhy men búgingi jetistikteri týraly Qazaqstandyq munaıshy-geologtar qoǵamynyń prezıdenti Baltabek Qýandyqov, NCOC konsorsıýmynyń basqarýshy dırektory Jaqyp Marabaev jáne basqalary áńgimeledi.
Sonymen birge, konferensııada sóz sóılegen QR Energetıka vıse-mınıstri Maǵzom Marzyǵalıev Kaspıı qaırańyndaǵy odan ári yntymaqtastyqtyń perspektıvalaryn atap ótti. Jańa kenoryndaryn ashý ınvestısııalar salýdy, jańa tehnologııalar tartýdy jáne jańa jumys oryndaryn ashýdy talap etedi. Búgingi kúni konsorsıým shamamen 16 mln tonna munaı men kondensat, 5 mlrd tekshe metrden astam gaz óndirdi, 700 myń tonnadan astam kúkirt eksporttady. Bul Qazaqstannyń teńiz jobalaryn damytýdyń bastamasy ǵana.
Konferensııanyń sońynda konsorsıýmnyń birqatar basshylary, jaýapty qyzmetkerleri, joba ardagerleri «Qazaqstannyń munaıgaz salasynyń eńbegi sińgen qyzmetkeri» tósbelgisimen, «Qazaqstannyń munaıgaz salasyn damytqany úshin» medalimen, gramotalarmen jáne alǵys hattarmen marapattaldy.
29 tamyzda Soltústik Kaspıı jobasynyń 25 jyldyǵyn toılaý «Qashaǵan daýysy» vokaldy oryndaýshylardyń mýzykalyq konkýrsymen jalǵasady. Is-shara N.Jantórın atyndaǵy fılarmonııada ótedi. Sol kúni keshke Sultan Beıbarys atyndaǵy alańda Atyraý turǵyndary men qonaqtary úshin oıyn-saýyq baǵdarlamasy bastalady. Kórermenderdiń nazaryna sýret salýdan sheberlik klastary, kóshe bı toptarynyń ónerleri usynylady. Sonymen qatar «Beshıktash» FK fýtbol sheberligi boıynsha sheberlik klastary ótedi.
