Kórsetilimge Syrtqy ister mınıstriniń orynbasary Roman Vasılenko men fılmniń basty keıipkeri, ATOM jobasynyń Qurmetti elshisi Káripbek Kúıikov qatysyp, sóz sóıledi.
Adamzattyń basyna tóngen atom ajdahasynyń zardabyn dúnıe júzine jetkizýde rejısser kóp ter tókkeni kórinip turdy. Fılm Semeı ıadrolyq polıgony mańyndaǵy halyqtyń qasireti jalpy adamzattyq zulmat ekenin álemge pash etýge tyrysqan. Káripbek Kúıikov sııaqty atomdyq alapattyń zardap shegýshileriniń qazaq dalasynda myńdap sanalatynyn kórsetýmen qatar, rejısser olardyń aıanyshty taǵdyryna adamzattyń nazaryn aýdarady. «Ne úshin, kim úshin keıbir eldiń bıleýshileri atom ajdahasyn shyǵaryp, ony qoldanǵysy keledi? Árbir qoldanǵan atom bombasynan keıin jarymjan adamdar týǵanyn qalaı ma? Onyń qasireti barlyq adamzatqa birdeı emes pe?» degen suraqtardy ózdi-ózine qoıǵan A.Sınger AQSh-taǵy «Nevada» ıadrolyq polıgon aımaǵynyń, Japonııanyń Hırosımo, Nagasakı qalasy turǵyndaryn da sóıletip, olardyń qandaı qasiretke ushyraǵanyn túsirgen. Káripbek te fılmde basynan ótken jaılardy ashyq aıtyp, ár bomba synalǵan saıyn ózderiniń úıleri júrip ketkendeı bolatynyn, barlyq shyny ydystar syńǵyrlap, jıhazdar teńselip, tóbe selkildep, úı dirildep ketetinin aıtty. Aldynda eki balasy óli týǵan anasy jańa sharanasynyń eki qoly joq ekenin kórgende esi shyǵyp ketkenin, dárigerler balany máńgilikke uıyqtatyp tastaý týraly keńes bergenin, tek ákesi jany bar shaqalaqty ólimge qımaı, úıine alyp kelgenin aıtqan kezde estip otyrǵandar aýyr kúrsinip otyrdy. Bet aýyzy biteý isikti balalar, aıaq-qoly ǵana emes kóz-qulaqtary joq jandar atom qasiretin barsha álemge aıdaı etip áshkerelep tur.
Bul fılm BUU-da kórsetilýimen qatar, álemniń talaı iri ortalyqtarynda usynylyp, qazaqstandyq ATOM jobasyn qoldaýshylar sanyn kóbeıtken eken. Fılmdi túsirgen brıtandyq kınostýdııanyń ataýy «Spring Films». Árıne basqa da birneshe stýdııa osy taqyrypta fılmder túsirgen, biraq myna stýdııanyń ónimi aıryqsha eken. Ol basynan aıaǵyna deıin kórermenderdi jalyqtyrmaıtyn, tartymdy týyndy ekeni kórinip turdy.
Jaqsybaı SAMRAT,
«Egemen Qazaqstan».
