Bul joly óńirimizdiń jeti óńirinen, sondaı-aq Reseı men Qyrǵyzstannan aqtys saıysqa jasy 35-ten asqan 22 ardager sportshy joldama alyp, ózara kúsh synasty. Jarystyń bas tóreshisi Vıktor Bespıatovtyń aıtýynsha sharshy alańda qolǵap túıistiretin boksshylarǵa ulttyq quramaǵa múshe bolmaý, densaýlyǵynyń jaramdylyǵy, jas mólsheriniń shekteýligi sekildi birqatar shart-talaptar qoıylǵan.
Desek te, aqtyq saıysqa irkilmeı jetken úmitkerler arasynda bir kezderi sharshy alańnyń shańyn shyǵarǵan gúrzi judyryqty myqtylar bolǵanyn da aıta ketken jón. Máselen, absolıýttik salmaqta Reseıdiń namysyn qorǵaı kelgen Saıran Smaıylovtyń Irlandııa-Reseı týrnıriniń, bokstan polıseıler men órt sóndirýshilerdiń álem chempıonatynyń jeimpazy syqyldy at úrketin ataqtaryna qarap jankúıerlerdiń birqatary oǵan jeńisti aldynala berip te qoıǵan bolatyn. Biraq «kúsh atasyn tanymaıdy» demekshi, bes salmaq dárejesinde jan alyp, jan berisken básekede jurt kútpegen nebir kórinister oryn aldy.
Petropavldyq Rýstam Jaqypov pavlodarlyq Asylbek Qalyqovty taza jeńip, 64 kılo salmaq boıynsha alǵashqy «Rıng koroli» atandy. Osydan 17 jyl buryn boks qolǵaptaryn shegege ilgen qaraǵandylyq Qýanysh Isembaev jarysqa jaqsy daıyndyqpen kelgen eken. Myqty qarsylasyn tize búktirip, 75 kılo salmaqta teńdessiz sheber ekenin tanytty. 81 kılo salmaqta Túrkistan oblysynyń ókili Qasymhan Ospanovtyń joly boldy. 91 kılo salmaqta synǵa túsken ekibastuzdyq Ádil Asaýbekov jeńisti ýysynan shyǵarmady. Asa aýyr salmaqta petropavldyq Andreı Beısembaev pen ombylyq Saıran Smaıylov qolǵap túısitirdi. Alań ıesi ótken jyly aqtyq saıysta súringen bolatyn. Bul joly sál-pál basymdylyqpen ashy jeńilistiń esesin qaıtardy.
Jeńimpazdar men júldegerlerge aqshalaı syıaqylar berilip, basqa da marapattar kórsetildi. Qyzyljar jerinde elimiz boıynsha tuńǵysh ret uıymdastyrylǵan halyqaralyq «Rıng koroli» týrnıri oblystyq ákimdiktiń qoldaýymen ótkizilip, dástúrge aınaldyrýdy sport jáne dene shynyqtyrý basqarmasy óz mindetine aldy.
О́mir ESQALI,
«Egemen Qazaqstan»
Soltústik Qazaqstan oblysy.
