Qazaqstan Respýblıkasy Úkimetiniń Qaýlysyna sáıkes, Azııa oıyndarynyń chempıondary men júldegerlerine arnaıy syıaqy bekitildi. Altyn júlde ıegerlerine 10 000, kúmis júldegerlerge 5000, qola medal ıegerlerine 3000 AQSh dollary kóleminde syıaqy tartý etildi. Sonymen qatar, erekshe kózge túsken sportshylardyń bapkerlerine de syıaqy taǵaıyndaldy.
«Qazaqstan sportshylary Djakartadaǵy jazǵy Azııa oıyndaryna qatysyp, jalpy esebi 76 medal jeńip aldy. Qurlyq dodasynda sportshylarymyz el namysyn abyroımen qorǵap, olımpıadalyq sport túrlerinen jaqsy nátıje kórsetti. Keıbir úmit etken sportshylarymyzdyń údeden shyqpaǵan sátteri de kezdesti. Biraq bul - sport, eń bastysy, Tokıodaǵy jazǵy Olımpıada oıyndarynda sáttilik pen jeńis tileımiz. Kelesi jyldyń 1 qańtarynan bastap ulttyq qurama komanda bas bapkerleriniń aılyǵy eki esege kóbeıtiledi. Sonymen qatar, UOK sportshylardyń Tokıo Olımpıadasyna daıyndyǵyn moınyna alyp, atletter alańsyz daıyndalýy úshin bar jaǵdaıdy jasaıdy», - dedi Qazaqstan UOK bas hatshysy Danııar Abýlgazın.
Sportshylar atynan karateden Azıada chempıony atanǵan Gýzalııa Ǵafýrova men shpagashy Dmıtrıı Aleksanın sóz aldy.
«Azııa oıyndaryna qarqyndy jattyǵý júrgizip, úlken daıyndyqpen attandyq. Sol aralyqta bizdi qoldaǵan bapkerlerge, jankúıerlerge jáne Ulttyq Olımpıada komıtetine kóp rahmet! Azıadada Qazaqstannyń alǵashqy altynyn ıelenip, qalǵan sportshylarymyzǵa jol ashqanyma qýanyshtymyn», - dedi Aleksanın.
Oıyn qorytyndysy boıynsha Qazaqstan sportshylary 24 olımpıadalyq jáne Olımpıada baǵdarlamasyna enbegen 3 sport túrinen (djıý djıtsý, sambo, kýrash) 15 altyn, 17 kúmis jáne 44 medal ıelenip, jalpy esepte 9-shy orynnan kórindi. Atletterimiz 24 olımpıadalyq sport túrinen júlde aldy. Azıada tarıhynda tuńǵysh ret shpagada semserlesýden jekeleı synda medalǵa ıe boldyq (D. Aleksanın, altyn medal). Sonymen qatar, esý slalomy (A. Kýlıkov, qola), batýtta sekirý (P. Álıev, qola) jáne maýntınbaıktan (K. Kazansev, qola) alǵash ret Azııa oıyndarynan júldege qol jetkizdik. Oıyn baǵdarlamasyna alǵash ret engen dzıýdodan komandalyq aralas synda bizdiń komanda kúmis júldeger atandy. Segiz jyldyq úzilisten soń júzýden komandalyq estafetada qola medal ıelenip, kórkem gımnastıkadan qurlyq úzdigi ataǵyn qaıtaryp aldyq. Nebary 16 jastaǵy gımnastarymyz Azıadany baǵyndyrǵan bolatyn.
Jalpy alǵanda, Azııa oıyndarynda 30 sportshymyz jeńimpaz atandy. 46 sportshy kúmis, 66 sportshy qola júldeger. Komandalyq sport túrlerin qosa eseptegende (142) árbir úshinshi qazaqstandyq sportshy Azıada medalin jeńip aldy. 17 komanda Azıadaǵa tolyqtaı jańartylǵan qurammen qatysty. Aıta ketý kerek, Qazaqstan komandasyndaǵy sportshylardyń basym bóligi Azııa oıyndaryna alǵash ret qatysyp otyr.
