Marapaty mol merekelik shara

Oblys ortalyǵyndaǵy «Qonys» sport saraıynda el Táýelsizdiginiń 20 jyldyǵyna arnalǵan saltanatty shara boldy. Merekelik saltanatta sóz alǵan oblys ákimi Arhımed Muhambetov óńirdiń ekonomıkalyq-áleýmettik damýyndaǵy qol jetkizilgen negizgi jetistikterge toqtaldy. Sodan keıin óńir basshysy oblystyń ekonomıkalyq jáne áleýmettik-mádenı damýyna eleýli úles qosqan, memlekettik jáne qoǵamdyq qyzmetterde tabysty eńbek etken aqtóbelikterge Qazaqstan Respýblıkasynyń memlekettik nagradalaryn tapsyrdy. Olardyń arasynan Uly Otan soǵysynyń II toptaǵy múgedegi Isa Dármenov – III dárejeli «Aıbyn», Áıteke bı aýdanynyń ákimi Esimhan Esenbaev – «Parasat», «SNPS-Aqtóbemunaıgaz» AQ dırektorlar keńesiniń tóraǵasy Sýn Bo – II dárejeli «Dostyq», on eki adam «Qurmet» ordenderimen, on alty aqtóbelik «Eren eńbegi úshin», bes aqtóbelik «Shapaǵat» medaldarymen marapattaldy. Oblystyq fılarmonııanyń ánshisi Marat Áıtimov pen oblystyq balalar klınıkalyq aýrýhanaasynyń bólim meńgerýshisi Vladımır Kotlobovskıı «Qazaqstannyń eńbek sińirgen qaıratkeri» ataǵyna ıe boldy. Bir top aqtóbelik Qazaqstan Respýblıkasynyń Qurmet gramotasyn aldy. On adam «Oblystyń 2011 jyl adamy» atandy. Sondaı-aq, bir top aqtóbelikke oblys ákiminiń Alǵys haty men aqshalaı syılyǵy tapsyryldy. Merekelik saltanattyń arty konsertke ulasty. Oblys ortalyǵynda jáne aýdandarda el Táýelsizdiginiń 20 jyldyǵyna arnalǵan merekelik sharalar jalǵasyn tabýda. Satybaldy SÁÝIRBAI, Aqtóbe oblysy.