Ardagerler keńesiniń óz úıi bar

Osy kezge deıin oblystyq ardagerler keńesi kóringen mekemedegi artylǵan bólmede otyryp kelgen bolatyn. Al aǵa urpaqtyń da qoǵamda úlken orny bar. О́mirdi kórgen, tájirıbesi mol aqsaqaldar keńesimen atqarýshy bılik te sanasyp otyrady. Oblys jáne Qostanaı  qalasy  ákimderi keńese otyryp,  qalanyń  qaq ortasyndaǵy  eki qabatty ǵımaratty oblystyq ardagerler keńesine tutasymen berdi. Bul  qyzyl kirpishten órnektelip salynǵan  ǵımarat ótken ǵasyrdyń basynda bir kópestiń  ózine arnap saldyrǵan úıi eken. Ol qala tarıhynyń  arhıtektýralyq  jádigeriniń biri sanalyp, memlekettik qorǵaýǵa alynǵan. Kirpishi de, irgetasy da qaıraqtaı úı myqty, mamandar onyń áli bir-eki ǵasyr tapjylmaı turatynyna senimdi. Úıdiń birinshi qabatyn Qostanaı qalalyq , al ekinshi qabatyna oblystyq ardagerler keńesteri ornalasty. Ardagerler úıiniń edenine ásem kilemder tóselgen,  astyńǵy qabatynda 70 adam  otyratyn májilis zaly bar. Joǵarǵy qabatta ardagerlerdiń demalys zaly jasaqtaldy. Onda televızor, kompıýter, shahmat, doıby qoıylǵan. Oblystyq kitaphana dırektory Gúljamarııa Qazına ardagerler úıine 200 kitap syıǵa tartty. Endi munda atalar men ájelerge arnalǵan kitaphana da bolady. Olar gazet, jýrnal tigindilerin de kitaphanadan tabady. –Ardagerlerdiń mundaı keńse-úıi kez kelgen oblys ortalyǵynan tabyla bermeıdi.  Bizde de kópke deıin  ardagerler úıi bolǵan joq. Oblys basshylyǵynyń qamqorlyǵy, qala ákimshiligi men kásipkerlerdiń kómegi arqasynda Qostanaıdaǵy  sándi úılerdiń birin ardagerler keńesi ıemdenip otyr.  Endi biz óz sharalarymyzdy ótkizý úshin ózgelerdiń akt zaldaryn surap jatpaımyz,–deıdi oblystyq ardagerler keńesiniń tóraǵasy Kenjebek Ýkın. Ardagerler keńesi úıine kez kelgen zeınetker kelip, qatarlastarymen áńgime-dúken quryp, gazet-jýrnal oqyp ketýine bolady. Máni de, sáni de kelisken úıge kelgen  qarttar rýhanı baıyp qalady. Názıra JÁRIMBETOVA QOSTANAI