Oqý orny janyndaǵy Áleýmettik jáne genderlik ınstıtýttyń uıymdastyrýymen ótken is-sharaǵa bilim ordlasynyń stýdentteri qatysty.
G. Smaılova dáris barysynda genderlik baǵdarlanǵan bıýdjetteýdi memlekettik baǵdarlamalarǵa, josparlar men bıýdjet júıesine engizý týraly, qazaqstandyq qoǵamnyń ár múshesiniń múddesin, múmkindigi men quqyǵyn eskere otyryp, olardyń ashyqtyǵy men tıimdiligin arttyrý joldary týraly sóz qozǵady. Erler men áıelderdiń eńbek tólemaqysyndaǵy kezdesetin aıyrmashylyqtar týraly da aıtyldy. Osy máselege baılanysty «BUU-Áıelder» uıymynda atqarylyp jatqan jumystarǵa da toqtalyp ótti.
Lektor jıyn aıasynda taqyrypqa sáıkes daıyndalǵan beınebaıan men prezentasııany qatysýshylar nazaryna usyndy. Dáris sońynda genderlik máseleler boıynsha óz oıyn bildirip, pikir aıtqan stýdentter arnaıy syılyqpen marapattaldy.
Aıta keteıik, atalǵan shara Qyzdar Ýnıversıteti men «BUU-Áıelder» uıymynyń arasyndaǵy ózara áriptestik kelisim aıasynda ótip otyr.
– Búginde Qazaqstandaǵy «BUU-Áıelder» uıymy názikjandylardyń ekonomıkalyq quqyqtary men múmkindikter aıasyn keńeıtý, áıelderge qatysty zorlyq-zombylyqty joıý, kóshbasshylyq jáne elimizdiń qoǵamdyq-saıası ómirine qatysý jáne genderlik bıýdjettendirýdi engizý baǵyttarynda qyzmet atqarady. Biz óz baǵdarlamalarymyz arqyly aýyldyq eldimekenderde turatyn áıelderge qoldaý kórsetip, olardyń belsendiligin arttyrmaqpyz. Ol úshin biz názikjandylardyń qarjy jaǵynan ózgelerden táýelsiz bolýyna, bıznes qyzmetter men qarjy quraldarynyń qoljetimdi bolýyna kóńil bólemiz. Sondaı-aq, áıelderdiń quqyqtyq saýattylyǵyn arttyrýǵa jaǵdaı jasaýdamyz, – dep atap ótti Gúlnar Smaılova.
Onyń pikirinshe, Qazaqstandaǵy áıelderdiń áleýmettik-ekonomıkalyq máselelerin sheshý keshendi túrde júrgizilýde jáne memlekettik basqarý prosesine, barlyq sheshim qabyldaıtyn deńgeıge genderlik tásildi engizý qajettigin atap ótti.
