Bul sapar barysynda Koreı túbeginiń taǵdyryna qatysty kúrdeli máseleniń biri túbekti ıadrolyq qarýdan aryltý, eki eldiń birigýi, saýda jáne ekonomıkalyq yntymaqtastyq, dıplomatııalyq qarym-qatynas, áskerı teketiresti jumsartý, túbektiń qaýipsizdik máselesi, ústimizdegi jyldyń 27 sáýir kúni jarııalanǵan «Panmýnchjom deklarasııasyn» júzege asyrý jaǵdaıy jáne Amerıka jáne Soltústik Koreıa lıderleriniń josparly sapary, «Vashıngton, Phenıan, Seýl» úshjaqty kelissóz múmkindigi, 1950-53 jyly Koreı soǵysy saldarynan úzilip qalǵan temir jol, iri tas joldardy jandandyryp qosý, orman men sý resýrstaryn paıdalaný, mádenıet pen sport salasyndaǵy almasý men baılanystardy damytý jumystary talqylanady. Osy eki tún, 3 kúndik sapar kezinde eki jaq úkimettik tolyq jáne shaǵyn quramda bas qosyp, birqatar salalardy qamtıtyn kelissózderdi júrgizbek. Bul saparǵa eki eldiń úkimeti jan-jaqty jáne tyńǵylyqty daıyndaldy.
О́tken jeksenbi kúni, Seýl qalasynyń jergilikti ýaqytymen saǵat kúndizgi 3-te Ońtústik Koreı úkimeti aldaǵy seısenbi kúni Soltústik Koreıaǵa prezıdentpen birge baratyn delegasııa quramymen resmı túrde tanystyrdy. Tolyq tizimdi buqaralyq aqparat quraldary arqyly jarııalady. Delegasııa quramyna 66 adam kirdi. Bári derlik túrli salanyń tisqaqqan bilikti mamandary. Naqtylaı aıtqanda, delegasııa quramynda prezıdent ákimshiliginiń adamdary, Syrtqy ister mınıstri, Birigý isteri jónindegi mınıstri, Qorǵanys mınıstri jáne laýazymdy elshiler men dıplomattar, qaýipsizdik jáne áskerı salanyń mamandary bar. Odan basqa, parlamenttiń tóraǵasy, yqpaldy depýtattar, bılik partııasy – «Tobýro Mındjchýdan» jáne basqa da partııa ókilderi de barady. Sonymen qatar bıznes ortadan arnaıy Samsýng koorporasııasy kóshbasshysynyń biri Lı Chje Ion men koreı eliniń iri bıznesmenderi tizimge arnaıy kirgizildi. Olardyń bul saparǵa arnaıy ilesip barýy – eki eldiń arasyndaǵy keleshektegi júzege asyrmaq keń aýqymdy ekonomıkalyq, ınvestısııalyq jáne saýda jobalaryna qatystyrylýyna tikeleı baılanysty. Bulardan ózge, mádenıet, ǵylym, jastar isi komıteti, din jáne óner salasynyń ókilderi, tanymal ǵalym, aqyn-jazýshylar, jýrnalıster men aýdarmashylar da baratyndyǵy belgili boldy. Koreı elindegi birqatar iri dinderdiń ókilderi de tizimge qosyldy. Tek Islam dininiń ókilderi qalys qaldy. Halyqaralyq kelissózder jónindegi mamandardyń aıtýynsha, «Osy kezdesýdiń nátıjesinen keıin Soltústik Koreıa men Amerıkanyń arasyndaǵy arnaıy saparlar júzege asyrylady jáne eki eldiń arasyndaǵy baılanystar birqatar jaqsaryp, túbektegi beıbitshiliktiń turaqtylyǵy men túbekti ıadrolyq qarýsyzdandyrý isiniń bolashaq baǵyty men naqty is-sharalary anyqtalady», degen boljamdar aıtylýda. Ońtústik Koreıa halqy osy sapar men sammıtke úlken senim men úmit artyp otyr.
Dastan AQASh,
arnaıy «Egemen Qazaqstan» úshin
Ońtústik Koreıa,
Seýl qalasy
