«Kórkem sóz – kóńil tili, jalań sóz – zeıin tili» degen eken Ahmet Baıtursynov. Ádebıetti sóz óneriniń jaýharyna teńesek, kórkem ádebıet qoǵam ómiriniń aınasy ispettes. Babalarymyz «sóz óneri – dertpen teń»degen naqyl qaldyrǵan. Bul aıtylǵandardyń bári – qasıetti ana tilimizdiń bar kórkemdik qýatyn aıqyndaıtyn ómirdiń syrly sýretterin, halyqtyń kórkem tarıhyn kesteli tilmen órnekteıtin, kıeli qasıetin aıǵaqtaıtyn anyqtaýyshtar ekeni sózsiz. Ár ulttyń tili – onyń negizgi tiregi. Dostyqtyń kıeli mekeni sanalatyn atamekenimizde el men eldi, er men erdi uǵystyratyn, aldaspannan da ótkir ana tilimizdiń bolashaǵy úshin jasalyp jatqan arshyndy qadamdar, mańyzdy bastamalar az emes. Solardyń biri dep mazmuny tereń, máni kenen Tilder festıvaliniń dástúrge aınalyp, tamyryn tereńge jaıýyn aıtýǵa bolady. Memlekettik tildi nasıhattaý, mártebesin kóterý, qutty tuǵyryna qondyrý, qoǵam ómiriniń barlyq salalarynda keńinen qoldanylýyn qamtamasyz etý, mańyzdy qarym-qatynas quraly arqyly jastardyń Otanǵa, elge, jerge degen súıispenshiligin arttyrý maqsatyn dittegen alqaly basqosýda sóılegen sózinde oblys ákiminiń orynbasary Dáýren Jandarbek jınalǵandardy aıtýly mádenı sharanyń ashylýymen quttyqtap, sáttilik tiledi. Memlekettik tildiń damýyna eleýli úles qosyp júrgen bir top til janashyrlaryna Mádenıet jáne sport mınıstrliginiń,Tilderdi damytý jáne qoǵamdyq-saıası jumys komıtetiniń, aımaq basshysynyń qurmet gramotalary men alǵys hatttary tabys etildi. Jeti atalym boıynsha jeńimpaz atanǵan jergilikti ujymdar marapattaldy. Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń bólim jetekshisi Aıdos Tursynbaıuly óz sózinde bıylǵy festıval Alashtyń aqıyq aqyny Maǵjan Jumabaevtyń 125 jyldyq mereıtoıyna arnalyp otyrǵanyn jetkizdi.
Qazaqstan halqy tilderi baıqaýyna óńirimizdiń barlyq oblystarynan jáne Almaty, Astana qalalarynan Abaı atyndaǵy kórkemsóz oqý sheberleriniń jeńimpazdary kelip, birinshi kezeńde qazaqtyń belgili jazýshylarynyń prozalyq shyǵarmalarynan úzindiler oqydy. Sahna shymyldyǵyn birinshi bolyp Sh.Esenov atyndaǵy Kaspıı memlekettik tehnologııalar men ınjırıng ýnıversıtetiniń stýdenti, Mańǵystaý oblysynyń namysyn jyrtyp kelgen Arǵyn Qosaı ashty. Ol jurtshylyqqa Oralhan Bókeıdiń áńgimesinen úzindi usynyp, jaqsy daıyndyqpen kelgenin kórsetti. Sol sııaqty shymkenttik Batyrhan Tolaǵaı, pavlodarlyq Erkejan Tóleýbek, qyzylordalyq О́mirbaı Abylaıhan, qostanaılyq Jumabek Arýjan, taǵy basqalary da kórkem sóz oqýdyń qyry-syryn ábden meńgerip alǵandaryn ańǵartty. Ekinshi kezeń Maǵjan shyǵarmalaryn mánerlep oqýǵa arnaldy.
Belgili qoǵam qaıratkeri Aldan Smaıyl tóraǵalyq etken qazylar alqasy ár úmitkerdiń bilimi men biligin, óneri men óresin baǵalaýda shyǵarmanyń tańdalýyna, oryndaý sheberligine, sahnalyq daıyndyǵyna, kıim kıisine basa nazar aýdaryp, bas júldege Shyǵys Qazaqstan oblysynyń úmitkeri Saıa Bekbosynova laıyq dep tapty. Birinshi oryndy aqtóbelik Altyn Qojanova, ekinshi oryndy elordalyq Qulpynaı О́mirbekova, úshinshi oryndy pavlodarlyq Erkejan Tóleýbek pen petropavldyq Janarbek Sekel ıelendi.
Jeńimpazdar men júldegerlerge arnaıy dıplomdar, alǵys hattar, aqshalaı jáne yntalandyrý syıaqylary tabys etildi.
– Festıval joǵary dárejede uıymdastyryldy. Oqýshy qyzymyz Saıanyń 97 upaı jınap, top jarǵanyna qýanyshtymyz. Ol Zaısan aýdanynda jumys isteıtin halyq teatry janyndaǵy kórkemsóz oqý úıirmesiniń turaqty múshesi. Respýblıkalyq baıqaýlardyń birneshe dúrkin jeńimpazy, – dedi Zaısan halyq teatrynyń rejısseri Alma Súleımenova qýanyshyn jasyra almaı.
О́mir ESQALI,
«Egemen Qazaqstan»
Soltústik Qazaqstan oblysy
