Kezdesýdi ashqan «Nur Otan» partııasy Tóraǵasynyń birinshi orynbasary Máýlen Áshimbaev búginde qoǵamymyzda áleýmettik, ekonomıkalyq, halyqaralyq jaǵdaılarǵa baılanysty túrli máseleler bar ekenine toqtaldy.
– Qazirgi qoǵam ózekti máselelerge qatysty naqty ári ádil jaýapqa muqtaj. Osyǵan baılanysty «Nur Otan» partııasy atalǵan túıtkilder boıynsha júıeli jumys júrgizýdi jalǵastyra beredi. Bizdiń búgingi memleket pen qoǵam arasyndaǵy ózara is-áreketti jandandyrý máselesin kóterý úshin jınalýymyzdyń ózi partııanyń osy baǵyttaǵy jumysynyń nátıjesi ekeni sózsiz, – dedi M.Áshimbaev.
Sonymen qatar partııa Tóraǵasynyń birinshi orynbasary qoǵam men bılik arasynda dıalog mádenıetin qalyptastyrý máselesine nazar aýdardy.
– Mundaı dıalog tek bir-birimizdi tyńdaýmen ǵana shektelmeı, qoǵamdy alańdatqan máselelerdi sheshýdiń tıimdi tetikterin qarastyratyn basqosý bolýy tıis. Qazirgi tańda elimizde ekonomıka, saıasat, rýhanııat jáne áleýmettik salany qamtıtyn keshendi jańǵyrý jóninde naqty kún tártibi bar. Sondyqtan atalǵan dıalog barysynda Qazaqstandy jańǵyrtý jáne qordalanyp qalǵan máselelerdi sheshý joldaryn talqylaýymyz kerek, – dedi M.Áshimbaev. Sondaı-aq ol osy másele boıynsha birneshe baǵyttarǵa toqtaldy.
– Birinshiden, barlyq memlekettik organ qyzmetteriniń ashyqtyǵyn qamtamasyz etetin Open Government Partnership baǵdarlamasyn engizýimiz kerek. Búginde qandaı da bir mańyzdy memlekettik baǵdarlama men bastamany qabyldar aldynda qoǵamnyń talqysyna salý dástúrge aınaldy. Open Government Partnership aıasynda osy mehanızmderdi jandandyryp, basqa da tetikterdi qarastyrý kerek. Qoǵamnyń jaı talqylap qana qoımaı, áleýmettik salada tıimdi usynystar daıyndaýǵa belsendi qatysýyn qamtamasyz etýimiz qajet. Al memleket olardy eskerýi tıis. Dıalogtiń ekinshi mehanızmi men baǵyty – qoǵamdyq keńesterdiń jumysy. Bul jóninde Qoǵamdyq damý mınıstrliginiń tıisti zańǵa ózgerister engizýdi qolǵa alýy kóńil qýantady. Bul der kezinde júzege asyrylǵan jumys dep esepteımin. Osy baǵytta bárimiz jumys isteýimiz kerek. Sol zańǵa taban tiregen tıimdi qoǵamdyq keńester qurýymyz kerek. Úshinshi baǵyt – «Nur Otan» partııasy. Partııa talqylaýlar men pikirtalas alańy bolýǵa jáne túrli máselelerdi sheshý joldaryn Úkimet, memlekettik organdar jáne ákimdikterdiń aldyna qoıýǵa daıyn. Sondyqtan ózekti máselelerdi partııa alańynda talqylaýdyń bereri mol dep esepteımin, – dedi ol.
Osy ispettes trendter Qazaqstanda ózekti bolyp tabylady. Áleýmettik jelilerdegi tanymal lıderlerdiń aýdıtorııany qamtýy kóptegen dástúrli BAQ-tan asyp ketýi múmkin. Pozıtıv sııaqty, aıla-sharǵylyq sıpattaǵy yqpal etýdiń úlgileri de paıda bolýda. О́zara áreket etýdiń dástúrli úlgileri eskirýde. Búgingi qoǵam ózara áreket etýdiń zamanaýı tásilderine muqtaj.
Pikirtalas qorytyndysy boıynsha, naqty usynystar pysyqtalyp, olar Úkimet, Parlament jáne jergilikti atqarýshy organdarǵa joldanady.
Joldybaı BAZAR,
«Egemen Qazaqstan»
