Almaty qalalyq onkologııa ortalyǵynyń bas dárigeri Nursultan Izmaǵambetov qazirgi tańda qalyptasqan jaǵdaıdan shyǵýdyń barlyq amaly jasalyp jatqanyn aıtady.
«Gerseptın»dárisiniń bir qutysy 300 myń teńge turady. Demek, kezekte turǵan naýqastarǵa sondaı 290 quty kerek. Bul 90 mıllıon teńge degen sóz. Asa qymbat dárini shetelden tasymaldaý da ońaıǵa túspeı tur. Degenmen dárilik zattyń búginge deıin ýaqytynda jetkizilmeýi sebepterin ashyp aıtqan «SK-Farmasııa» ókili Natalıa Zelenskaıa 20 qyrkúıekke deıin Qazaqstan aýmaǵyna zárý preparattyń qajetinshe jetkiziletinine sendirdi. Osy oraıda Áleýmettik medısınalyq saqtandyrý qorynyń Almaty qalasy bólimshesiniń dırektory Tóleýhan Ábildaev:
– Bıyl Almatynyń onkologııalyq qyzmeti 2017 jylǵy deńgeıde qarjylandyryldy. Dárilik zattarmen qamtýda túıtkildi másele joq. Tek bir aýrý boıynsha dárilik zattyń bir túri jetkizilmeı jatyr. Qordyń ortalyq apparaty men mınıstrlik bul máseleniń sheshilý jolyn jan-jaqty qarastyrý ústinde, – dep túsinikteme berdi.
Onyń aıtýynsha, tek qana bıyl Almatynyń onkologııalyq qyzmeti úshin 3 mlrd 222 mln teńge bólingen. Jalpy, bıyl Shveısarııadan quny 2,5 mlrd teńge bolatyn 55 ataýly dárilik zat jetkizý josparlanǵany da osy brıfıngte atap ótildi.
Talǵat SÚIINBAI,
«Egemen Qazaqstan»
ALMATY
