Basqosýda matematıka pánin mektepterde oqytý máselesine kóbirek kóńil bólindi. Bilim berýdiń jańartylǵan mazmuny jaǵdaıynda jalpy bilim berý mektepterine ádistemelik qoldaý kórsetý týraly aıtqan Nazarbaev zııatkerlik mektebiniń muǵalimi Ý.Isakova jańadan engizilgen ádistemelerdiń ozyq jáne osal tustaryna toqtaldy. Oblystyq bilim basqarmasynyń mektepke deıingi jáne jalpy orta bilim berý ádistemelik kabıneti matematıka jáne fızıka sektorynyń meńgerýshisi Baqytgúl Talqanova shaǵyn jabdyqtalǵan mektepterde toptyq jumystardy qoldaný jáne oqýshylardyń bilimin baǵalaý máselesin kóterdi. Shaǵyn jabdyqtalǵan mektepterge arnap matematıka pánin júrgizýge arnalǵan ádisteme jasaýdy usyndy. Professor Jeńisnur Qujekeev bastaýysh mektepterde balalardyń óz betinshe zertteý jumystaryn júrgizý máselesin kótere otyryp, bul oraıda tájirıbeniń óte azdyǵyn aıtty. Qostanaı qalasyndaǵy Fızıka-matematıka lıseıiniń muǵalimi S.Saıapına balalardy jas kezinen ǵylymǵa baýlýdy bastaýysh synyptardan bastap olımpıada men ǵylymı jumystar konkýrstaryna qatystyrý arqyly tárbıeleý kerektigin ortaǵa saldy.
«Dóńgelek ústel» májilisinde pedagogıka ǵylymdarynyń kandıdattary T.Shýmeıko, A.Mýsilimova, pedagogıka ýnıversıteti Fızıka-matematıka jáne jalpytehnıkalyq pánder kafedrasynyń meńgerýshisi O.Telegına, Nazarbaev zııatkerldik mektebiniń muǵalimi, matematıka magıstri M.Musabekova jáne basqalar matematıka pánin oqytýdyń problemalaryn jan-jaqty qozǵady.
«Matematıkalyq kásibı bilim berýdiń negizderin ustazymyz marqum Tobyl Dáýletbaev aınalysqa bolatyn. Ol óziniń magıstrlarymen, áriptesterimen birigip ınjener-tehnıkalyq, ekonomıkalyq, agro-bıologııalyq, pedagogıkalyq, ıaǵnı matematıkalyq emes mamandar daıyndaıtyn fakýltetterge arnap monografııalar, oqý-ádistemelik oqýlyqtar jazdy. О́kinishke qaraı, qazir joǵary synyptarǵa matematıkalyq bilim berýdiń ádistemeleri jetise bermeıdi» dedi M.Musabekova.
Oqytýshylar men ǵalymdar májilisti qoryta kele, kemshilikter bolǵanymen Qostanaı óńirindegi mektepter men joǵary oqý oryndarynda matematıkalyq bilim berý isinde alǵa basýshylyq, jaǵymdy jańalyqtar bar jáne mamandardyń biliktiligi joǵary ekenin aıtyp, ortaǵa salynǵan problemlardyń sheshý joldaryn izdestirýde kúsh biriktirýge kelisti.
Názıra JÁRIMBET,
«Egemen Qazaqstan»
Qostanaı
