Býrabaıdaǵy Abylaı han alańynan bastalyp qasıetti Túrkistanǵa deıingi on kúndik joldan alǵan áserlerimen barlaý ekspedısııasynyń basshysy, qoǵam qaıratkeri Murat qajy Ydyrysuly, pedagogıka ǵylymdarynyń kandıdaty, memlekettik tarıh ınstıtýtynyń ǵylymı qyzmetkeri Jabaı Qalıev, geograf-bıolog, kartograf, Qazaqstan Respýblıkasy Qarýly Kúshteriniń áskerı-tarıhı murajaıynyń zertteýshisi Ǵızat Tabýldın jáne tarıh ǵylymdarynyń kandıdaty, Memleket tarıhy ınstıtýtynyń jetekshi zertteýshisi Qanat Eńsepov bólisti.
Bul joba «Rýhanı jańǵyrý» memlekettik baǵdarlamasyn iske asyrý sheńberinde Aqmola oblysynyń ákimshiligi men Murat qajy Ydyrysulynyń, memlekettik tarıh ınstıtýttarynyń, «Qasıetti Qazaqstan» ǵylymı-zertteý ortalyǵynyń qoldaýymen bastaldy. Ekspedısııa baǵyty soltústikten ońtústikke qaraı Kókshetaý, Býrabaı, Aqmola, Qorǵaljyn, Barshıno, Ulytaý, Jezqazǵan, Qyzylorda jáne Túrkistan sııaqty qalalar men eldi mekenderdi qamtydy.Joldy ótý kezeńinde onyń qatysýshylary ǵylymı-zertteý jumystaryn júrgizip, Qazaqstannyń etnomádenı landshafty obektilerinde ornalasqan qasıetti oryndardyń, tarıhı muralardyń eskertkishterin kartaǵa túsirdi.
Oblystyq ishki saıasat basqarmasynyń basshysy Gúljanar Shókeeva Aqmola oblysynyń ákimi Málik Myrzalınniń atynan zertteýshiler tobyna alǵysyn bildirdi.
О́z kezeginde, ekspedısııa músheleri oblys basshysyna jáne qoldaý kórsetken kásipkerlerge alǵystaryn bildirdi. Aqmola oblysynyń ákimi Málik Myrzalınge «Qazaq handary jáne olardyń urpaqtary» kitaby, sondaı-aq, qatysýshylardyń qoltańbalarymen jalpy uzyndyǵy 3,5 myń shaqyrymdy quraıtyn joldyń kartasy berildi.
Ekspedısııanyń ótkizilgen kezeńiniń qorytyndysy boıynsha ǵylymı-praktıkalyq konferensııa ótkiziledi. Aqmola oblysy ákimdiginiń tapsyrmasy boıynsha monografııa shyǵarylyp, «Abylaı hannyń qara joly» derekti fılmi daıyndalady. Budan bólek, Qazaqstanda teńdesi joq topografııalyq karta qurastyrylyp shyǵarylady, munda Kókshetaý jáne Aqmola oblysynyń landshaftyń tabıǵı tarıhı toponımderi qoldanylatyn bolady.
Ekspedısııa 10 kún jolda boldy. 27 qyrkúıek kúni oblys zııalylary zertteýshilerdi Kókshetaý qalasyna kire beriste saltanatty túrde qarsy aldy.
Baıqal BAIÁDIL,
«Egemen Qazaqstan»
