Shynynda da, halqynyń qajyr-qaýqary, jastarynyń jalyn-kúshi kem bolsa, ıaǵnı eldiń adamı turǵydaǵy densaýlyq máselesi aqsap tursa, tabys pen turmastyń sapasy qaıtip artpaq? Igilikterdi iske asyratyn aldymen adam emes pe?! Mine, osy turǵydan kelgende, qazaqstandyqtardyń ál-aýqatynyń ósýi – deni saý ulttyń, aıaq-qoly balǵadaı alǵadaı jastardyń qolynda.
Uzaq jyldardan beri qazaq kúres óneriniń órken jaıýyna qyzmet etip kele jatqan, jarty ǵasyrlyq ǵumyryn jattyqtyrýshylyqqa sarp etken adam retinde aıtarym: bizdiń elimizde dene shynyqtyrý men sport arqyly halyqtyń densaýlyǵyn túzegende ǵana, Qazaqstan barlyq salada bıik belesterdi baǵyndyrady degenge nyq senemin. Elbasy osy jolǵy Joldaýynda: «Úkimetke jáne ákimderge kem degende 100 dene shynyqtyrý-saýyqtyrý keshenin salýdy tapsyramyn. Sondaı-aq, qoldanystaǵy, ásirese mektepterdegi sport ǵımarattaryn tıimdi paıdalanyp, dene shynyqtyrýmen aınalysý úshin aýlalardy, parkterdi, saıabaqtardy jabdyqtaý qajet», dep naqty tapsyrmalar berdi.
Álbette, qazirgi tańda elimizdiń iri qalalarynda, aýdan ortalyqtarynda dene shynyqtyrý-saýyqtyrý keshenderin salýda aıtarlyqtaı artyqshylyqtar bar. Suranys – joǵary, qarjylyq múmkindik – mol. Al aýylda she? О́kinishke qaraı, dál qazirgi ýaqytta aýyldyq jerlerdiń eń quryǵanda qarapaıym sport zalyna degen muqtajdyǵy zor. Álemdik deńgeıdegi jarystarda elimizdiń jaqsy atyn shyǵaryp júrgen sańlaqtardyń deni aýyldan shyǵatynyn eske alsaq, muny sportymyzdyń tamyryna balta shabar, óte ótkir turǵan másele dep aıtpasqa laj joq.
Iаǵnı, túptep kelgende, Elbasy aıtqan dene-shynyqtyrý-saýyqtyrý keshenderiniń eń quryǵanda kishi modelderin aýyldyq jerlerde kóptep salýǵa erekshe nazar aýdarǵan jón dep oılaımyn.
Jasyratyny joq, búgingi kúnde jattyqtyrýshylardyń alatyn jalaqysy da mardymsyz. Aýyldyq jerde sportpen aınalysýǵa jaǵdaı jasalmasa, bala baýlyǵan bapkerdiń eńbekaqysy tym az bolsa, ol jaqqa kim barǵandaı? Aýylda qarapaıym sport saraıy bolmasa, bapker barmasa, qanshama balanyń talanty topshysynan qıylady deseńizshi... Osy oraıda Elbasynyń ortasha jalaqyny ósirý jónindegi tapsyrmasy nysanaǵa dóp tıgendeı. Munyń sharapatyn bapkerler, sport mamandary da kórse, nur ústine nur bolar edi.
Sonymen qatar, bıylǵy Joldaýda ustazdar mártebesiniń mereıin ústem eter, quqyǵyn qyzǵyshtaı qorǵar alǵysharttarǵa basa mán berilýin óz basym Qazaqstannyń eńbek sińirgen muǵalimi retinde qýana qabyldadym. Nege deseńiz, urpaq tárbıesimen aınalysqan adamǵa qatysty qoǵamnyń, memlekettiń kózqarasy ózgermeıinshe, «Máńgilik El» ıdeıasyn júzege asyratyn jas býynǵa degen zárýlik kúnnen kúnge arta bermek.
Dıqanbaı BITKО́ZOV,
KSRO jáne Qazaqstannyń eńbek sińirgen jattyqtyrýshysy,
Qazaqstan Respýblıkasynyń eńbek sińirgen muǵalimi
QARAǴANDY
