primeminister.kz
QR ulttyq ekonomıka mınıstri T. Súleımenovtyń aıtýynsha, jalpyulttyq josparda elimizdiń damýy úshin qolǵa alynatyn negizgi alty mindet boıynsha 100 is-shara qamtylǵan.
Memleket basshysy Joldaýdaǵy birinshi tapsyrma — «Halyq tabysynyń ósýi» mindeti boıynsha qazaqstandyqtardyń ál-aýqatynyń ósýine erekshe nazar aýdardy. Bul maqsatqa jetý úshin qazaqstandyqtardyń tabysyn arttyryp, ómir súrý sapasyn jaqsartýǵa baǵyttalǵan 24 is-shara qarastyrylyp otyr.
«Qazaqstandyqtar úshin asa mańyzdy sharalardyń biri – 2019 jylǵy 1 qańtardan bastap eń tómengi jalaqy mólsherin birtindep 1,5 ese artyrý sharasy. Halyqtyń kirisin qorǵaý úshin zańnamaǵa tarıf belgileý tetiginiń, kommýnaldyq qyzmetterdi tutynýshylardyń qarajatyn paıdalanýdyń ashyqtyǵyn qamtamasyz etý úshin ózgerister engiziletin bolady. Bıznesti tıimdi qoldaý maqsatynda 2025 jylǵa deıingi Bıznestiń jol kartasy baǵdarlamasy jalǵastyrylady», — dedi T. Súleımenov.
«Turmys sapasyn arttyrý» ekinshi mindettiń aıasynda eki mańyzdy sala — bilim berý jáne densaýlyq saqtaýdy qamtıtyn 24 is-shara kózdelgen. Ulttyq ekonomıka mınıstriniń málimdeýinshe, oqýshylar ornynyń tapshylyǵyn joıý jáne úsh aýysymdy mektepter problemasyn sheshý maqsatynda osy jyldyń sońynda óńirlerde mektepterdiń qurylysy bastalatyn bolady.
Densaýlyq saqtaý salasynda medısına qyzmetteriniń sapasyn arttyrý úshin 2019 jylǵy 1 qańtardan bastap barlyq emhanalar men aýrýhanalar medısınalyq qujattamany qaǵazsyz, sıfrlyq túrde júrgizýge kóshedi.
«Bıyl Astanada Ulttyq ǵylymı onkologııalyq ortalyqtyń qurylysy bastalady. Ol qazirgi zaman talabyna jaýap beretin qurylǵylarmen jabdyqtalady. Halyqty sapasyz jáne densaýlyqqa qaýipti taýarlar men qyzmetterden qorǵaý maqsatynda Taýarlar men qyzmetter sapasyn jáne qaýipsizdigin baqylaý komıteti qurylady», — dedi T. Súleımenov.
Ulttyq ekonomıka mınıstri Jalpyulttyq jospardyń barlyq sharalary turǵyn úı jaǵdaılaryn jaqsartýǵa, elimizdiń kez kelgen eldi mekeninde jaıly ári qaýipsiz ómir súrýge jaǵdaı jasaýǵa baǵyttalǵanyn atap ótti.
Buǵan qosa, elimizdi tıimdi aýmaqtyq uıymdastyrý maqsatynda Elimizdi aýmaqtyq-keńistiktik damytýdyń 2030 jylǵa deıingi boljamdy shemasy qabyldanatyn bolady, bul Elimizdiń basqarylatyn kenttenýiniń jańa kartasyna aınalady. Mınıstrdiń aıtýynsha, О́ńirlerdi damytýdyń 2025 jylǵa deıingi baǵdarlamasy naqty is-sharalaryn, jobalary men qarjylandyrý kólemin kórsete otyryp kelesi jyly qabyldanatyn bolady. Kólik ınfraqurylymyn, kommýnaldyq jáne turǵyn úı qurylysyn damytý maqsatynda «Nurly jol», «Nurly jer» memlekettik baǵdarlamalary uzartylatyn bolady.
Sondaı-aq, T. Súleımenovtyń aıtýynsha, quqyq qorǵaý organdarynyń jumysyn túbegeıli jaqsartý jáne azamattar qaýipsizdigin qamtamasyz etý maqsatynda halyqpen jumys isteýdiń jańa zamanaýı formatyn engizýdi, qoǵamdyq qaýipsizdikti monıtorıngileý júıelerimen qamtamasyz etýdi kózdeıtin ishki ister organdaryn jańǵyrtý boıynsha Jol kartasy qabyldanatyn bolady.
«Sottardyń jumys isteýiniń zamanaýı formatyn jáne ozyq elektrondyq servısterdi engizý, artyq sot rásimderin qysqartý arqyly sot júıesi odan ári jańǵyrtylatyn bolady», — dedi ol.
«Azamattar suranysyna beıimdelgen memlekettik apparat» atty tórtinshi mindet aıasynda 19 is-shara kózdelgen. Memleket pen qoǵam arasyndaǵy alshaqtyqty qysqartý maqsatynda memlekettik saıasattyń naqty sharalary men nátıjelerin adamdarǵa túsindirýdi kózdeıtin «Jańa formasııanyń basshysy» baǵdarlamasy ázirlenetin bolady.
«Tıimdi syrtqy saıasat» besinshi mindeti aıasynda syrtqy saıasatty qazirgi jaǵdaılarǵa beıimdeý jáne ulttyq múddeni pragmatızm qaǵıdattarynda ilgeriletý boıynsha sharalar qabyldanatyn bolady.
«Árbir qazaqstandyqtyń elimizdegi ózgerister úderisterine atsalysýy» altynshy mindettiń sheńberinde 6 is-shara kózdelgen.
T. Súleımenovtyń aıtýynsha, «Rýhanı jańǵyrý» baǵdarlamasyna jańa mazmun men baǵyttardy qarastyratyn ózgerister men tolyqtyrýlar engiziledi. Memleket basshysy jarııalaǵan Jastar jyly aıasynda jastardyń barlyq sanatyn qoldaý sharalaryn kózdeıtin is-sharalar jospary qabyldanatyn bolady. Áskerı-patrıottyq tárbıeniń rólin kúsheıtý úshin mektepterde «Sarbaz» balalar-jasóspirimder birlestigi qurylady.
«Jalpy alǵanda Jalpyulttyq jospardy ýaqytyly oryndaý Memleket basshysynyń halyqtyń ál-aýqatyn jaqsartýǵa baǵyttalǵan Joldaýda bergen tapsyrmalaryn tıimdi iske asyrýdy qamtamasyz etýge múmkindik beredi jáne elimizdegi áleýmettik-ekonomıkalyq turaqtylyqty qamtamasyz etýge negiz bolady», — dep túıindedi ulttyq ekonomıka mınıstri.
