Qandaı qalamger, qandaı ultjandy tulǵa edi. Bet-júzge qaramaıtyn, shyndyqty shyryldatyp aıtatyn, qalamynan zamana zary tógilip turatyn jazýshy-qaıratker bolatyn. Endi qazaq elinde Sheraǵań da «Bir kem dúnıege» aınalyp ketti.
Sherhan Murtaza shekpeninen shyqqan qazaq qalamgerleri, oqyrmandary aza tutyp otyr. Ol óz zamanynyń zapyranyn aıta alǵan, jaza alǵan naǵyz halyq jazýshysy.
Uly qalamgerdiń orny oısyrap turǵaly qashan?! Dert dendep, ólim men ómir arpalysyp jatty. Biraq Sheraǵań aıtatyn sózin aıtyp jatty. Ol jaqsylyqqa qýana da bildi, kemshilikke kúńirene ún qatty. Endi ol joq. Tóle bı babamyz dúnıe salǵanda Áıteke bı aıtypty:
– Tóle bı óldi degenshe ádilet óldi deseńshi, – dep. Mine, Sheraǵańnyń ólimin qalyń qazaq osylaı qabyldap otyr.
...«Egemen Qazaqstan» gazetine Sheraǵańdy keńesshilik qyzmetke shaqyrǵanym jadymda jańǵyryp tur.
– Batyr, jazǵanymdy qysqartpasań, óńdemeseń kelisem, – dep qolyn usynyp edi sonda Sheraǵań.
Qol alysý Alla atymen serttesýmen birdeı. Osylaı «Egemende» Sherhan Murtaza men Kamal Smaıylovtyń bir jarym jylǵa sozylǵan hattaryn jarııalap edim.
– «Kamal dos, sen XXΙ ǵasyr Qazaqstan ǵasyry deısiń. Ras shyǵar. Biraq sol altyn men kúmisten kúptelgen sandyqtyń ústinde qazaq nege jalańbut otyr» dep jazbap pa edi Sheraǵań!
...Sheraǵańmen Parlament Májilisinde depýtat ta boldyq. Egemen elimizdiń alǵashqy jyldarynda qıyndyqtar az bolǵan joq. Úkimetti synǵa alatyn sanaýly ǵana depýtattar boldy. Sonyń serkesi – Sheraǵań edi. Sheraǵań aıtqan taǵy bir sóz umytyla ma? Bıýdjetti talqylaý sáti edi. – Qarataı dos, (Turysov. – Ý.Qalıjan) endi bul úkimetti qansha qýsań da bir de bir qumalaq túspeıdi deısiń, endeshe mundaı úkimettiń halyqqa ne keregi bar, – degen de Sheraǵań edi.
Sheraǵańnyń ár sózi adamnyń sanasyna sińip, búkil jan dúnıeńdi qozǵap jiberedi. Myna sózderge nazar aýdaralyqshy:
«Qyp-qyzyl ótirikti kótere beretin osy dúnıe ǵana. O dúnıege ondaı qýlyq ótpeıdi».
«Rýhanı álemi keń, rýhy bıik el − qaısar el. Ondaı eldi eshkim jeńe almaıdy. Rýhy synǵan, rýhanı júdegen eldi jeńý de jeńil».
Mine, Sheraǵań, Sherhan Murtaza aǵamyzdyń ómirden rýhy osylaı synbaı ótti. О́zi aıtqandaı «O dúnıe ondaı qýlyq ótpeıtin» máńgilik álemge Sherhan Murtaza tazalyqtyń, ádildiktiń, shynshyldyqtyń aq jebesi bolyp attanyp bara jatyr.
...Orta ǵasyrdaǵy Shyǵystyń ataqty shaıyry Rýmı aıtypty:
«Uly adamdardyń beıitin jer betinen izdemeńder, olar óz halqynyń júregine jerlenedi» dep. Sheraǵań, Sherhan Murtaza da óz halqynyń, óz ultynyń júregine jerlenetin ult tulǵasy. Azaly qazaq jurtyna kóńil aıtamyn! Baqul bolyńyz, jan aǵa!
Ýálıhan QALIJANOV
