Halyqaralyq kezdesýge Densaýlyq saqtaý mınıstrligi men DDU-nyń ókilderi, Amerıkanyń onkologııalyq aýrýlardy emdeıtin jetekshi klınıkasy Sent Djýd (Áýlıe Iýde) balalar gospıtaliniń basshylary men dárigerleri, Qazaqstandaǵy onkologııalyq jáne gematologııalyq qyzmettiń damýyna úles qosyp kele jatqan Reseıdiń D.Rogachev atyndaǵy balalar gematologııasy, onkologııasy men ımmýnologııasy federaldyq ǵylymı-klınıkalyq ortalyǵy (Máskeý), Belarýsten Balalar onkologııasy, gematologııasy men ımmýnologııasy ǵylymı-praktıkalyq ortalyǵynyń (Mınsk) basshylary men onkolog-dárigerleri, sondaı-aq Moldova, Ýkraına, Grýzııa, Armenııa, Tájikstan, О́zbekstan, Túrikmenstan, Ázerbaıjan, Mońǵolııa, Qyrǵyz elderiniń atalǵan salalarynyń jetekshi mamandary men sarapshylary qatysty. Eske sala keteıik, birinshi kezdesý 2018 jyly sáýirde Máskeý qalasyndaǵy D.Rogachev atyndaǵy balalar gematologııasy, onkologııasy men ımmýnologııasy federaldyq ǵylymı-klınıkalyq ortalyǵynda ótken edi.
– Búgingi kezdesýdiń Qazaqstan balalar onkologııasy men gematologııasy salasy úshin mańyzy zor, – dedi sharanyń ashylý saltanatynda Pedıatrııa jáne balalar hırýrgııasy ǵylymı ortalyǵynyń basshysy, professor Rıza Boranbaeva. – Álemdik standarttarǵa saı, sapaly joǵary tehnologııalyq medısınalyq kómekpen qamtamasyz ete otyryp balalardyń densaýlyǵyn qorǵaý men nyǵaıtý – Pedıatrııa ortalyǵynyń basty maqsaty. Qazaqstandaǵy onkologııalyq jáne gematologııalyq qyzmettiń damýyna zor úles qosyp kele jatqan Reseıdiń D.Rogachev atyndaǵy onkologııalyq ortalyǵyna, DDU-ǵa jáne AQSh-tyń Sent Djýd balalar gospıtaline búgingi mańyzdy sharany uıymdastyrýǵa muryndyq bolǵandary úshin alǵys aıtamyn. Bul kezdesý balalar onkologııalyq qyzmetiniń damýyna tyń serpin berip, Eýrazııalyq aımaq sarapshylarynyń yntymaqtastyǵyn odan ári arttyra túsedi, – dedi ol.
Jıyn barysynda atalǵan joba qaterli dertpen kúres jolynda barlyq qatysýshy elderdi biriktirip, joǵary sapaly medısınalyq kómekti alýǵa múmkindik jasaıtyny onkologııalyq aýrýlarǵa shaldyqqan balalardyń ómir súrý uzaqtyǵyn jaqsartý jolyndaǵy jahandyq bastamany iske asyrýdaǵy alǵashqy qadam ekendigi atap ótildi. Kezdesýge qatysýshylar aıtylǵan saladaǵy ózekti máselelerdi talqylap qana qoımaı, búgingi jaǵdaıyn saraptap, ózara pikir almasty. Eki kún boıy ótken basqosýda ár eldiń mamandary balalardaǵy qaterli isik aýrýlaryn dıagnostıkalaý men emdeýdiń zamanaýı ádis-tásilderimen, medısınalyq kómek kórsetýdi uıymdastyrýdaǵy tájirıbelerimen bólisti.
– Biz qazaq eline birinshi ret kelip otyrmyz. Maqsatymyz – jahandyq deńgeıde barlyq balaǵa qaterli dertti jeńýge kómektesý. Álemdegi ár bala óz jasyna jetpeı ómirden ótpeýi kerek dep sanaımyz. Jáne bul máseleni DDU-nyń aldyna qoıǵan edik. Atalǵan uıymnyń qoldaýymen ótip jatqan búgingi shara osy maqsattyń alǵashqy qadamy. Biz barlyq TMD elderine kómek kórsetkimiz keledi. Kez kelgen, atap aıtqanda dárigerler men medbıkelerdiń biliktiligin arttyrý, bilim berý, ǵylymdy damytý, onkologııalyq aýrýlardy dıagnostıkalaý men emdeý ádis-tásilderimen, tehnologııa, tájirıbemen bólisýge ázirmiz, – dedi Sent Djýd balalar onkologııalyq gospıtaliniń vıse-prezıdenti Karlos Rodrıgez-Galındo.
Onyń pikirinshe, Qazaqstanda balalardyń onkologııa salasy bir júıege túsirilgen emdeýdiń joǵary deńgeıinde. «Búgin Pedıatrııa ortalyǵyn aralap, jumys barysymen tanysyp, onkologııa men gematologııa jáne transplantologııa bólimderinde boldyq. Balalar úshin joǵary deńgeıde barlyq jaǵdaı jasalǵan eken. Kóńilimizden shyqty. Ásirese ortalyqtandyrylǵan júıe men emdeý sapasyna tánti boldyq», dep atap ótti K.Rodrıgez-Galındo.
Qazirgi tańda álemdegi onkolog, gematolog dárigerlerdiń eń mańyzdy mindetteriniń biri qaterli dertke shaldyqqan balalardyń ómir súrý uzaqtyǵyn odan ári uzartý. Sarapshylardyń Máskeýde ótken birinshi kezdesýi Eýrazııalyq aımaq-taǵy ortaq máselelerdi anyqtap, balalar onkologııasy salasynyń aldaǵy damý baǵytyn aıqyndap berse, ekinshi kezdesý balalar men jasóspirimderge pallıatıvtik kómek berý júıesin uıymdastyrý jáne damytý baǵytyn, balalar gematologııasy men onkologııasy salasynyń medbıkeleri úshin biryńǵaı sertıfıkattaý baǵdarlamasyn daıyndaý, balalardaǵy qaterli isik aýrýlaryn emdeýdiń keshendi standarttaryn ázirleý, onkologııalyq aýrýlarǵa shaldyqqan balalardyń biryńǵaı tirkelimderin qurý máselelerin naqtylady. Sonymen qatar bilimdi damytý, hattamalardy ázirleý, arnaıy zertteý toptarynyń basty baǵdary men Eýrazııalyq aımaqtaǵy balalar onkologııalyq qyzmetin damytýdyń basymdyqtary anyqtaldy.
Kezdesý aıasynda sharaǵa qatysýshylar Pedıatrııa jáne balalar hırýrgııasy ǵylymı ortalyǵy men qaterli dertke shaldyqqan balalardy ońaltý ortalyǵy – «Alataý» respýblıkalyq klınıkalyq shıpajaıynda bolyp, eki mekemeniń qyzmetimen tanysty. Sharanyń ekinshi kúni amerıkalyq professor Karlos Rodrıgez-Galındo Pedıatrııa ortalyǵynyń onkolog-gematolog mamandary úshin arnaıy dáris oqydy.
Gúlzeınep SÁDIRQYZY,
«Egemen Qazaqstan»
