Abaı Ǵazızulyn Torǵaı, Qostanaı kóleminde bilmeıtin adam joq. Jastaıynan óziniń ólmes ónerimen tanylǵan A.Ámirhanov esimi onyń talantyn qurmettegen úlken-kishige jaqsy tanys. Ol kezinde Qostanaıdaǵy "Mıras" ansamblin uıymdastyryp, ulttyq ónerdi nasıhattaýǵa erekshe úles qosty. Keıin Astana qalasyna qyzmetke aýysyp, sondaǵy "Saryarqa" ansambline jetekshilik etti. Astana qalalyq fılarmonııasyn basqardy.
Abaı túrki tildes jastardyń basyn biriktirip, "Oral muńy" halyqaralyq festıval-baıaýyn uıymdastyrýshylardyń biri bolǵan edi. Eki jylda bir ret Bashqurtstannyń Ýfa qalasynda ótetin bul óner jarysyna Qyrǵyzstan, Túrkimenstan, Qazaqstan, Altaı respýblıkasy, Sheshenstan, Daǵystan, Hakasııa, Týva, Tatarstan, Bashqurtstan jáne basqa elderden ulttyq óner maıtalmandary jınalyp, dýman qyzdyratyn. Abaıdyń "Mırasy" sol alaman báıgeden júldeli oralǵan edi.
«Eger Abaı bolmasa, «Mıras» bolmas edi. Búgin Abaı inimizdiń, meniń eń jaqsy kóretin dosymnyń árýaǵy bir aýnap túsken shyǵar. Búgingi keshti uıymdastyryp otyrǵan oblystyq fılarmonııa men qalalyq mádenıet bólimine, «Mıras» mádenıet úıine alǵysym sheksiz, – deıdi QR kompozıtorlar odaǵynyń múshesi Qalıbek Deripsaldın.
Festıvalde ár aýdannan kelgen óner ujymdary qazaqtyń kúılerin asqaqtatty. Sondaı-aq, halyqaralyq baıqaýlardyń júldegerleri Manapbek Qadyrov, Azamat Muqatov, Kúnsulý Jaqaeva, Qydyrbek Qıysqan, Botagóz Dúbirbaeva, Baıdos Qojasaǵıev, Nursultan Qasym t.b ánshiler halyq ánderin, qazaq kompozıtorlarynyń ánderin áýelete shyrqady.
Qysqasy, «Ǵasyrlar pernesi» festıvali qazaqtyń Abaı Ámirhanovtaı ónerpaz ulyna jasalǵan taǵzym ári jas urpaq boıyna sińire júrer taǵylymdy basqosý boldy.
Názıra Járimbet,
«Egemen Qazaqstan»
Qostanaı
Sýretti túsirgen Nurlan Seıdeǵalı
