Kórmede «Qyzyl traktor» qazaqstandyq óner tobynyń úsh júzge jýyq eksponaty qoıylǵan: kórkem sýret, grafıka, monýmentti músindik jumys, keńistiktik nysan, ınstallıasııa, performanstardyń muraǵattyq sýreti jáne beıneleri. Kórmeniń saltanatty ashylýynda «Qyzyl traktor» óner toby «Tazartý» atty óziniń tanymal performanstarynyń birin usyndy.
Aıta ketken jón, Qazaqstannyń art-sahnasynda 90-jyldardyń basynan beri belsendi eńbek etip júrgen «Qyzyl traktor» qatysýshylary – transavangard qozǵalysynyń negizin salýshylar. Topty keńistiktik qurylymdyq kompozısııa mektebiniń oqytýshysy jáne jolyn qýýshy Vıtalıı Sımakov qurǵan. Top qurylǵan ýaqyttan beri ataýyn birneshe ret ózgertken: «SaA toby», «Shymkent-Transavangard», «Sı qurylymdyq mektebi». 1995 jyly Moldaqul Narymbetovtyń usynysymen «Qyzyl traktor» ataýy berildi. Avtordyń túpki oıyna sáıkes, bul top álemdi sharlaýy tıis.
Toptyń músheleri, árqaısysynyń derbes shyǵarmashylyq jolynyń bolýyna qaramastan, «Oılar jınaǵy: Oıdaǵy oqıǵalar» kórmesindegideı jıi birigip turady.
«Qyzyl traktor» top tájirıbesinde aımaqtaǵy bolyp jatqan áleýmettik jáne saıası ózgeristermen tyǵyz baılanysta bolatyn kóshpeliler, sopylyq, shamanıstik fılosofııalardy qaıta oılastyryp, paıdalanatynymen belgili. Kóshpelilerdiń turaqty qozǵalysy, 90-shy jyldardaǵy tanymal narratıv, sondaı-aq tabıǵı materıaldardyń – aǵash, jún, kıiz, toqymanyń qasıettiligi qoldan jasalǵan shańqobyz, dombyra jáne baraban sekildi halyq aspaptaryn paıdalaýmen teń dárejede toptyń performanstarynda jıi kezdesedi.
Ekspozısııanyń ortalyǵynda – sýretshi, aqyn, fılosof jáne «Qyzyl traktor» tobynyń basty tulǵasy M. Narymbetovtyń keskindemesi qoıylǵan. M. Narymbetovtyń kórmege qoıylǵan shyǵarmalaryn Eýrazııalyq mádenı alıans qamtamasyz etti jáne júzdegen basqa eksponat sýretshilerdiń ózderiniń sheberhanalarynan, Qazaqstan men Ortalyq Azııadaǵy mýzeıler men jeke kolleksııalardan jınaldy.
Kórmeniń «Oılar jınaǵy: Oıdaǵy oqıǵalar» ataýy kórme kýratory Lıza Ahmadıdiń shyǵarma jelisine qatysty, ol sýretshini kórkemóner naryǵynan tys birinshi kolleksııa jııýshy dep ataıdy, bul sonymen qatar 2018 jylǵy Azııa zamanaýı óner aptalyǵynyń negizgi tujyrymdamasy.
«Fokýs Qazaqstan» jobasyn «Rýhnı jańǵyrý» baǵdarlamasy aıasynda Mádenıet jáne sport mınıstrliginiń qoldaýymen Qazaqstannyń Ulttyq mýzeıi uıymdastyrýda.
«Egemen-aqparat»
