Siz egerde Almatydan shyǵatyn Qulja jolymen Aspantaýdy betke alyp jolǵa shyqsańyz, 165 shaqyrymnan keıin Kókpek jazyǵy qushaǵyn aıqara ashyp, aqbas bıik taýlardyń keıpin keńeıte túsedi. Oń betkeıge nazar salsańyz, Toraıǵyr taýynyń ádemi áspeti bulańytyp, ózine menmundalap shaqyra beredi. Jýsandy saıdyń ózeginde jer astynan bulqyna býyrqanyp jatqan qaınar bulaq sýy tóskeıde kózińizge ottaı basylady. Bul jerdiń turǵyndaryna kópten tanys «Raıymbek bulaǵy» degenińiz, osy shirkin! Áıgili Buqar jyraý, Qaban jyraý, Sabdaly jyraý, Jambyl men Kódek, Tilemis shaıyrlar batyrdyń óshpes erligin jyrǵa qosyp, kúmbirlete jyrlaǵanyn bilemiz. «Kıeli meken» ataýymen kúre joldyń boıyna Almatyda, Eńbekshiqazaq jáne Raıymbek aýdandarynda turatyn batyr babanyń urpaqtary bul qasıetti bulaq basyna arnaıy baryp, qaınar kózin temir sharbaqpen erekshelep belgitas ornatyp qaıtqan-dy. Jol boıy Dýman dosymyzdyń aıtyp kele jatqany da osy bolatyn. Jaryqtyq, aldymyzda, kezinde kómilip qalǵan kózin ashqan Raıymbek babamyzdyń qaınar bulaǵy. Bul kúnde elge jetýge asyqqandaı býyrqanyp aǵady. Jol boıy qansha asyqsaq ta, qasıetti qaınardyń kese toly sýynan rahattana meıirlene urttadyq.
«Raıymbek bulaǵy» ary-beri ótken jolaýshynyń saýabyn alyp býyrqanyp qaınap jatyr. Bulqyna ber, batyr babanyń móldir sýy...
Paı shirkin, Raıymbek bulaǵy...
Saparbaı PARMANQUL,
«Egemen Qazaqstan»
