Kóshpeli halyqtar ilbisti kıeli, qasıetti ań dep qasterlegen. Bıqumar Kámalashulynyń «Qazaq halqynyń salt-dástúrleri» kitabynda «Ilbis terisin han ordasyna ilip, taqqa jaýyp, astyna tósenip otyratyn salt bar. Mońǵoldyń sońǵy hany Boǵda Jabzyndambynyń 150 ilbis terisin japqan kıiz úıi murajaıda saqtaýly. Ertede el basy, patsha, qaǵan, bı, tóre, batyrlar ilbis terisinen ishik kıgen. Ásker basy, erjúrek bahadúrler dushpandaryna aıbat kórsetý úshin, ilbis terisin jamylyp jaýǵa shabatyn bolǵan. Batyrlar jaýyna shabarda, barysqa uqsas shubar, teńbil shubar at minip, dushpanynyń úreıin qashyryp «aıbarlanatyn» bolǵan» dep jazady.
Qazirgi ýaqytta Qazaqstanda 130-ǵa jýyq ilbis bar. Aýyl sharýashylyǵy mınıstrligi Orman sharýashylyǵy jáne janýarlar dúnıesi komıteti qyzmetkerleriniń aıtýynsha, ilbisterdi qorǵaýdyń, kóbeıtýdiń júıeli sharalary qolǵa alynǵan. Ilbisti zańsyz atyp alǵany úshin 2 myń AEK (4 mln 810 myń teńge) kóleminde aıyppul salynady nemese 3-7 jyl aralyǵynda bas bostandyǵynan aıyrylýy múmkin.
Aıa О́MIRTAI,
«Egemen Qazaqstan»
