Sýretti túsirgen Aleksandr KÝPRIENKO
«Qarashyǵanaq Petroleým Opereıtıng bv» kompanııasynyń qarjysyna boı kótergen sport ǵımaratynyń alańy 3056,7 sharshy metr, jalpy aýdany 13 597,3 sharshy metrdi quraıdy. Keshen qurylysy 2017 jyldyń shilde aıynda bastalyp, 2018 jyldyń shilde aıynda aıaqtaldy. Joba quny - 321,6 mln teńge.
«О́ńirlik deńgeıdegi rezervterdi taýyp, buqaralyq sport pen dene shynyqtyrýdyń qoljetimdiligin arttyrý qajet. Úkimetke jáne ákimderge kem degende 100 dene shynyqtyrý-saýyqtyrý keshenin salýdy tapsyramyn. Sondaı-aq, qoldanystaǵy, ásirese mektepterdegi sport ǵımarattaryn tıimdi paıdalanyp, dene shynyqtyrýmen aınalysý úshin aýlalardy, parkterdi, saıabaqtardy jabdyqtaý qajet» degen edi Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda.
- Bul – dál Prezıdent tapsyrǵandaı, aýyldyq jerde ashylǵan dene shynyqtyrý jáne saýyqtyrý kesheni. Joldaýda mundaı qurylystar eldimekenniń bolashaǵyn, turǵyndar sanyn eskerip salynsyn delingen. Bórli – bolashaǵy bar aýyl. Mundaǵy jergilikti mektepte 550 oqýshy, agrotehnıkalyq kolledjde 300 stýdent oqıdy. Keshende dástúrli sport túrleri de, basketbol, fýtbol, voleıbol úıirmeleri de bolady. Sondaı-aq munda oblysta tuńǵysh ret qysqy sport túrlerinen – dopty hokkkeı men shańǵydan shákirt daıyndaıdy. Buryn dopty hokkeı komandasynda oınaǵan Azamat Májik Bórli aýylyna jattyqtyrýshy bolyp attandy, oǵan qyzmettik páter berildi. Osynyń bári jergilikti bılik tarapynan kórsetilip jatqan úlken qoldaý ǵoı, - deıdi Batys Qazaqstan oblystyq sport basqarmasynyń basshysy Ásııa Amanbaeva.
Elbasymyzdyń óńirlerde buqaralyq sportty damytý týraly tapsyrmasy Aq Jaıyq óńirinde qarqyndy júzege asyrylyp jatyr. 2018 jyldyń 9 aıynda jergilikti bıýdjet esebinen Oral qalasy men aýdandarda 28 sporttyq alań salynǵan. Jyl sońyna deıin taǵy 23 alań salynyp, jalpy sany 41-ge jetpek. Al aldaǵy ýaqytta «Nur Otan» partııasymen birlesip óńirde 100 jańa sport alańy salynýy josparlanǵan.
- Sporttyq alańdar, strıt-ýorkaýt jabdyqtary shynymen de buqaralyq sporttyń damýyna yqpal etedi. Aýylda da, qalada da oyndaı alańdardyń bos turǵanyn kórgen emespin. Erteli-kesh halyq tolyp júredi, - deıdi Ásııa Raqymqyzy.
Statıstıkaǵa kóz salsaq, Batys Qazaqstan oblysy turǵyndarynyń 27,1%-y, ıaǵnı 175245 adam dene shynyqtyrý jáne sportpen turaqty shuǵyldanady eken. 2018-2019 oqý jylynda oblys mektepterinde ár túrli baǵyttaǵy 838 seksııada 43120 oqýshy sportpen aınalysqan. Kolledjderdegi 496 sporttyq seksııaǵa 11728 stýdent turaqty baryp júr. Túrli sporttyq-kópshilik sharalarǵa da halyq yqylaspen qatysady. Máselen, Jeńis kúnine arnalǵan kópshilik júgirýge 1000-ǵa jýyq adam, Qazaqstan Respýblıkasynyń memlekettik qyzmetshiler kúni merekesine arnalǵan kópshilik júgirýge – 600, Elordamyz – Astana qalasynyń 20 jyldyǵyna arnalǵan «Aqjaıyq dýatlon-2018» jarysyna – 500-ge jýyq qatysýshy qatysqan. Qazaqstan Respýblıkasynyń Prezıdenti N.Á. Nazarbaevtyń júldesi úshin Batys Qazaqstan oblysynyń VI Halyq sporty oıyndary 200-ge jýyq áýesqoı sportshynyń basyn qosypty.
- Bizdiń óńirdiń geografııalyq jaǵdaıy trıatlon jarystaryn ótkizýge de qolaıly. Keler jyly buıyrsa Oral qalasynda trıatlon saıysyn ótkizý jsoparda bar. Oraldaǵy sport mektebiniń birinde trıatlon bólimi de ashyldy, - deıdi basqarma basshysy.
Eske sala keteık, 2018 jyldyń 9 aıynda boıynsha Batys Qazaqstan oblysy sportshylary túrli respýblıkalyq jáne halyqaralyq jarystarda (Álem, Azııa, Qazaqstan Respýblıkasynyń chempıonattary) 428 medal (149 altyn, 118 kúmis, 161 qola) utyp aldy.
Qazbek QUTTYMURATULY,
«Egemen Qazaqstan»
Batys Qazaqstan
