12 serııadan turatyn jańa telehıkaıanyń aldyn ala kórsetilimi «Habar» telearnasynyń 23 jasqa tolǵan kúnimen tuspa-tus keldi. Tusaýkeserge basty rólderde oınaǵan Erkebulan Daıyrov pen Kámshat Joldybaeva, fılmniń túsirilim toby, óner adamdary jáne BAQ ókilderi qatysty.
Romantıka men dramaǵa toly fılmde turmys qurmaǵan jasy 30-dan asqan boıjetkenniń ómiri týraly baıandalady. Telehıkaıa jelisi boıynsha Qarlyǵash esimdi arý jalǵyz ózi úlken úıde ómir súredi. Jumysy tabysty júrip, eń qymbat dúkenderden kıinse de, jeke ómiri sátsiz bolady. Al kórshi úıde áıelinen erte aıyrylǵan Tasqyn esimdi zerger 3 kishkentaı qyzymen ómir súredi. Bir kúni Tasqyn jumys barysynda jaraqat alyp, jedel járdemmen aýrýhanaǵa túsedi. Ákelerin ýaıymdap dalada qalǵan 3 qyzdy terezeden kórgen Qarlyǵash olardy óziniń úıine ákeledi. Osydan keıin onyń ómiri ózgere bastaıdy.
«Teleserıaldaǵy negizgi másele – búgingi bizdiń qoǵamdaǵy kári qyzdar problemasy. Telehıkaıada qyzdardyń qyzmet qýyp, turmysqa keıinirek shyǵa jatarmyn degen oılary kórinis tabady. Serıaldyń ishinde romantıka, drama, komedııa janrlary bar. Bul týyndy arqyly qyzdar ýaqyt sozbaı turmys quryp, shańyraqty shattyqqa bóleýdi jıirek oılasa degen oıdy jetkizgimiz keldi. Sondaı-aq serıalda ana men qyzdyń arasyndaǵy qarym-qatynasty da qozǵadyq. Kóp jaǵdaılarda qyzdyń turmysqa shyǵýyna anasy qarsy bolyp jatady. Bir sózben aıtqanda búgingi qoǵamda bolyp jatqan dúnıeni kıno etip túsirdik», dedi teleserıaldyń bas prodıýseri Gúlnur Mamasarıpova.
Bas prodıýserdiń aıtýynsha, telehıkaıa 1 aı kóleminde Almaty qalasynda túsirilgen. Al basty rólder Erkebulan Daıyrov pen Kámshat Joldybaevaǵa arnalyp jazylǵan.
«Bul serıaldyń ssenarıi jazylyp bolǵan sátten men birden basty rólde Kámshat pen Erkebulan Daıyrovty kórdim. О́zim ishimnen osy ekeýi oınaýy kerek dep sheship qoıdym. Ekeýin shaqyryp sóılesip, ssenarııdi oqytyp, bir kelisimge keldik», deıdi ol.
Kámshat Joldybaeva buǵan deıin «Habar» agenttigi túsirgen «Traktorshynyń mahabbaty», «О́geı júrek» telehıkaıalarynda da oınaǵan bolatyn.
«Meniń keıipkerimniń ózime uqsas birneshe tustary bar. Jas erekshiligi, ómirdegi ustanymy men alǵa qoıǵan maqsaty, minezi maǵan óte uqsas. Búgingi qoǵamdaǵy máseleni kóterý arqyly, otbasy qundylyqtaryn kórsetkimiz keldi. Túsirilim barysy eshqandaı qıyndyq týǵyzbady. О́ıtkeni keıipkerim ózime qatty uqsaıdy», dedi teleserıaldaǵy Qarlyǵashtyń rólinde oınaǵan, Kámshat Joldybaeva.
Telehıkaıa «Habar» telearnasynda 29 qazannan bastap saǵat 19:15-te dúısenbi-beısenbi kúnderi kórsetiledi.
Marjan TILEÝBEK,
«Egemen Qazaqstan»
