«AQSh Qazaqstannyń jetekshi ınvestorlarynyń biri, el ekonomıkasyna $40 mlrd astam qarjy salynǵan», — dep A. Mamın, Chevron, Exxon Mobil, General Electric, Halliburton qosa alǵanda, energetıka, mashına jasaý, óńdeý salasy, óndirý sektoryn damytýdaǵy iri amerıkalyq kompanııalarmen tabysty ózara is-qımyldy atap ótti.
Memleket basshysy Nursultan Nazarbaevtyń 2018 jylǵy qańtardaǵy AQSh-qa resmı sapary ekijaqty yntymaqtastyqty damytýdyń jańa kezeńine aınaldy. Sapar barysynda $7 mlrd jýyq somaǵa saýda jáne ınvestısııalyq kelisimderge qol qoıyldy. Ýaǵdalastyqtar avıasııa jáne ǵarysh zertteýleri, munaı hımııasy jáne aýyl sharýashylyǵy, sondaı-aq, ınfraqurylymdyq damý salasyndaǵy jobalardy iske asyrýǵa baǵyttalǵan.
«Memleketter basshylary qabyldaǵan birlesken málimdeme men joǵary deńgeıde qol jetkizilgen ýaǵdalastyqtar ózara is-qımyldyń barlyq negizgi baǵyttarynda strategııalyq seriktestikti edáýir keńeıtýge jáne tereńdetýge jol ashady», — dedi A. Mamın.
Qazaqstan — Ortalyq Azııadaǵy ekonomıkasy naryqqa barynsha baǵdarlanǵan el. Qazaqstanǵa barlyq JIО́-niń 70% jáne aımaqqa salynatyn TShI jalpy aǵynynyń 80% tıesili. Jahandyq jáne óńirlik saýda men óndiristik prosesterge birigý men ashyqtyqtyń artýy ekonomıkanyń dınamıkalyq ósiminiń negizgi faktorlardyń biri retinde sanalady.
Elimizdiń JIО́ 2018 jyldyń qyrkúıek aıyndaǵy jaǵdaı boıynsha 4,1% ósti jáne ortasha merzimdi perspektıvada onyń ósýi jalǵasady dep kútilýde. 2018 jyldyń 8 aıynda syrtqy saýda 22%-ǵa ósti. Bıyl syrtqy saýda kólemi $100 mlrd jýyq bolady dep kútilýde, al eksport jalpy saýda aınalymynyń 65% quraıdy.
«2017 jylǵy shildede qurylǵan «Astana» halyqaralyq qarjy ortalyǵy ınvestorlardy qorǵaý jónindegi negizgi mekeme. AHQO Nıý-Iork, Sıngapýr, London jáne Dýbaıdaǵy jetekshi qarjy ortalyqtarynyń úzdik tájirıbelerin negizge alýda. Platformanyń seriktesteri – NASDAQ amerıkalyq bırjasy, Morgan Stanley jáne Goldman Sachs iri amerıkalyq qarjy uıymdary», — dep A. Mamın, sheteldik qatysýmen 24 myńnan astam kompanııa Qazaqstanda tabysty bıznes júrgizip jatqanyn atap ótti.
Olardyń 700-den astamy amerıkalyq kompanııalarmen birge qurylǵan. Bul kompanııalar Qazaqstanǵa halyqaralyq kapıtal men úzdik tájirıbelerdi tartýda, aımaqta, sondaı-aq halyqaralyq deńgeıde qazaqstandyq eksportqa artyp kele jatqan suranysty qanaǵattandyrýda mańyzdy ról atqarady.
«Qazaqstan Úkimeti amerıka saýda mıssııasynyń saparyn eki memleket Kóshbasshylarynyń kelisimderin is júzine asyrýdyń ajyramas bóligi retinde qarastyrady», — dedi A. Mamın.
Saýda mınıstri AQSh QR-men yntymaqtastyq baǵyttaryn ártaraptandyrýdy jalǵastyrýǵa nıetti ekenin atap ótti.
«Eger buǵan deıin amerıkalyq kapıtaldyń negizgi baǵyttary Qazaqstannyń óndirýshi jáne energetıkalyq sektory bolsa, búginde biz ınfraqurylymdy damytýǵa, óńdeý, mashına jasaý, agroónerkásip keshenin jáne birqatar basqa da joǵary tehnologııalyq salalardy damytýǵa qarjy salýǵa nıettimiz», — dedi ol.
AQSh-tyń saýda mınıstri joǵary deńgeıde qol jetkizilgen ýaǵdalastyqtardy, sonyń ishinde «ashyq aspan» qaǵıdaty boıynsha Qazaqstan men AQSh arasyndaǵy áýe qatynasy týraly kelisimdi odan ári iske asyrýdyń mańyzdylyǵyn atap ótti. Qujat Qazaqstan men AQSh qalalary arasyndaǵy ushý-qoný shekteýlerin alyp tastaýdy bildiredi, bul jaqyn arada eki el arasyndaǵy jolaýshylar men júk tasymalynyń kólemin edáýir arttyrady.
QR Premer-Mınıstriniń Birinshi orynbasary A. Mamınniń jáne AQSh-tyń saýda mınıstri Ý. Rosstyń qatysýymen 8 qujatqa qol qoıyldy.
