«Memleket basshysy balanyń tulǵa retinde qalyptasýynda mektepke deıingi kezeńniń mańyzdylyǵyn atap ótip, balalardyń damýyna, balalarǵa arnalǵan mekemelerde olardyń qaýipsizdigi men mazmundy tárbıeleýin qamtamasyz etýge erekshe nazaryn aýdardy. Prezıdent bir jyl buryn Parlament palatalarynyń birlesken otyrysy kezinde áleýmettik saladaǵy memleket-jekemenshik áriptestigi sheńberinde mektepke deıingi mekemeler jelisin keńeıtýge shaqyrdy.
Atalǵan saladaǵy shaǵyn jáne orta bıznesti damytý úshin jasalǵan tıimdi jaǵdaılar jeke balabaqshalar sanyn kóbeıtýge jáne mektepke deıingi jastaǵy balalardy 2,5 ese kóbirek orynmen qamtamasyz etýge múmkindik berdi. Búginde 3-6 jastaǵy balalardyń 95%-y mektepke deıingi tárbıeleý jáne oqýmen qamtylǵan.
Sonymen qatar birinshi kezekte, jeke balabaqshalardyń qyzmetin taldaý nátıjeleri Memleket basshysynyń balabaqshalarǵa qatysty alańdaýshylyǵyn rastaıdy. Atalǵan mánmátinde mektepke deıingi mekemeler personalynyń olardyń tárbıelenýshilerine qatysty qatygez qarym-qatynasy jıilep ketkenin atap ótý qajet. Muny buqaralyq aqparat quraldaryndaǵy jáne áleýmettik jelilerdegi beınejazbamen rastalǵan jarııalanymdar, sondaı-aq Ombýdsmen mekemesiniń atyna kelip túsetin azamattardyń shaǵymdary kýálandyrady.
Astana qalasyndaǵy «Asyl» balabaqshasynda, Almaty qalasyndaǵy «Sımba» balabaqshasynda, Pavlodar oblysynyń Aqsý qalalyq balabaqshasynda, sondaı-aq basqa da mektepke deıingi mekemelerde oryn alǵan birqatar oqıǵalar keń aýqymda qoǵamdyq rezonansqa ıe boldy. Temirtaý qalasyndaǵy balabaqshada oryn alǵan zorlyq-zombylyqqa qatysty oqıǵanyń beınejazbasy otandyq BAQ-ta ǵana emes, Reseıdiń ortalyq telearnasynyń efırinde de talqylandy.
Joǵaryda kórsetilgen faktileriniń keń aýqymdy geografııalyq jáne mezgildik mazmuny balalarǵa arnalǵan mekemelerdiń qyzmetindegi júıeli problemalardyń bar ekenin jáne olardy sheshý boıynsha tıimdi sharalardyń joqtyǵyn aıqyndaıdy. Atalǵan mánmátinde kóp jaǵdaıda balabaqshalardyń ákimshiligi esh jaýapkershilikke tartylmaıtyny jáne óz qyzmetin burynǵy rejimde jalǵastyra beretini nazar aýdartady. Aqmola oblysynda balabaqsha tárbıeshisiniń týberkýlezben aýyratynynyń anyqtalýy joǵaryda kórsetilgendi rastaıdy. Densaýlyq saqtaý mınıstrligi Bas sanıtarlyq dárigeriniń atalǵan fakti boıynsha buqaralyq aqparat quraldarynda keltirgen dáıekteri problemanyń mańyzdylyǵyn tolyq ashyp kórsetpegen. Prezıdenttiń Joldaýynda balabaqshalar qyzmetkerlerine qatysty biliktilik talaptaryn qaıta qaraý týraly aıtylǵan tapsyrmasy óte mańyzdy jáne der kezinde kóterilip otyr», delingen Ombýdsmen úndeýinde.
Joǵaryda aıtylǵan máselelerge baılanysty Ombýdsmen beıindi vedomstvoǵa tıisti «jol kartasyn» ázirleý kezinde mektepke deıingi bilim berý salasyndaǵy qyzmetti lısenzııalaýdy alyp tastaý isin jan-jaqty taldaýdy usynǵan. О́ıtkeni, buǵan deıin lısenzııalaýdy joıǵan normatıvtik-quqyqtyq aktilerdi qabyldaý kásipkerlikti yntalandyrǵanymen, balabaqshalardaǵy qalyptasyp otyrǵan jaǵdaılardy kúrdelendirip otyr.
Sondaı-aq mektepke deıingi mekemeler qyzmetiniń ashyqtyǵyn qamtamasyz etý maqsatynda azamattyq qoǵam ókilderiniń turaqty monıtorıng júrgizýin jaqsartý týraly usynym berildi.
Daıyndaǵan Joldybaı BAZAR,
«Egemen Qazaqstan»
