«Shertpe kúı» festıvaliniń basty maqsaty – elimizdegi talantty kúıshilerdi qoldaý, shertpe kúı ónerin damytý bolyp tabylady. Saıysqa Qazaqstannyń Eńbek sińirgen qaıratkeri, Qazaq Ulttyq óner ýnıversıtetiniń professory, dáýlesker kúıshi Janǵalı Júzbaı tóraǵalyq etti. Sonymen qatar, «Qurmet» ordeniniń kavaleri, tanymal kúıshi Muhamedjan Tileýhan, Qurmanǵazy atyndaǵy Qazaq ulttyq konservatorııasynyń professory, kúıshi Bilál Ysqaq, kúıshi, kúı zertteýshisi Murat Ábýǵazy, Táttimbet atyndaǵy respýblıkalyq kúıshir konkýrsynyń bas júldegeri Qaırat Aıtbaev sekildi sańlaqtar qazylyq etti.
Festıvaldiń saltanatty ashylýy qarsańynda ótken arnaıy baspasóz máslıhatynda sóz alǵan qazylar alqasynyń tóraǵasy Janǵalı Júzbaı óz pikirin aıtty.
«Jalpy «Sherpe kúı» saıysy buryn da birneshe márte ótken. Al, respýblıkalyq deńgeıde, ultymyzdyń uly murasy retinde tuńǵysh ret ulyqtalyp otyr. Qazaqtyń qanyn da, janyn da, salt- dástúr, ádep-ǵurpyn bir aýyz sózsiz túsindiretin erekshe qudiret ol – kúı. Kúı óneri tek qazaqqa ǵana tán baǵa jetpes asyl mura. Búginde Altaıdan Atyraýǵa, Arqadan Alataýǵa deıin irge tepken halqymyzdyń arasynda sherpe kúıdiń oryndaýshylyq negizin salyp, mektebin qalyptastyrýshy Baıjigit, Beısembi, Táttimbet, Qojeke, Súgir syndy uly kúıshilerdiń esimi keń taraǵan. Biz ata-babadan jetken sol murany keıingilerge jetkizýshilermiz. Búgingi rýhanı jańǵyrý aıasynda qolǵa alynǵan kúı festıvaliniń kıeli Jetisý jerinen bastalýynyń ózi zor qýanysh. Men barlyq qatysýshylarǵa sáttilik tileımin» –dedi ol.
Festıvaldiń saltanatty ashylýynda Almaty oblysy ákiminiń orynbasary, dástúrli ánshi Aqan Ábdýáli sóz sóılep, barshy jınalǵan qaýymdy kúı merekesimen shyn júrekten quttyqtap, saıyskerlerge sáttilik tiledi.
Saıys eki kezeńnen turdy. Birinshe kezeńde kúıshiler Baıjigittiń «Kókbalaq», Táttimbettiń «Bes tóre», Toqanyń «Bastaý qosbasar», Aqqyzdyń «Muńdy qyz» kúılerin oryndap, óz sheberlikterin kórsetti. Nátıjesinde 24 saıyskerdiń ishinen 12 kúıshi kelesi kezeńge joldama aldy.
I. Jansúgirov atyndaǵy mádenıet saraıynda ótken dúbirli dodanyń ekinshi kezeńinde 12 kúıshi ózara myqtyny anyqtap, saıys baǵdarlamasyna engen Súgirdiń «Bes jorǵasyn», Ábiken Hasenovtyń «Qońyryn», Tólegen Mombekovtyń «Saltanatyn», Nurǵısa Tilendıevtiń «Armanyn» jáne Beıisbaıdyń «Shyńyraý» kúılerin tartty.
Qazylar alqasynyń bir aýyzdan qabyldaǵan sheshimi nátıjesinde Bas júlde Astana qalasynan kelgen tanymal kúıshi Aqjýsan Imanǵazyqyzyna berildi. Birinshi oryndy túrkistandyq Serik Pazylov, ekinshi orynda atyraýlyq Aınur Sakýpova men Shyǵys Qazaqstannan kelgen Syrym Nurmoldın enshilese, júldeli úshinshi oryndy Pavlodardan kelgen Ertis Saıyrhan men almatylyq Maǵaýııa Samal qanjyǵalaryna baılady.
Festıvaldiń bas júlde ıegerine Mádenıet mınıstri Arystanbek Muhamedıulynyń atynan arnaıy dıplom men «Altyn dombyra» músini, sonymen qatar, 1 000 000 teńge qarjylaı syılyq tabystaldy.
Aqjýsan Imanǵazyqyzy – tanymal kúıshi. Onyń oryndaýyndaǵy kúıler Qytaıdyń Halyq radıosynyń altyn qorynda saqtalǵan. Fransýz mýzykatanýshysy Gsave Allezdiń bastamasymen Parıjde shyqqan Táttimbet kúıleriniń dıskisine Aqjýsannyń oryndaýyndaǵy Táttimbettiń bes kúıi engen.
