Osy oraıda Jambyl oblysy ákimdiginde óńirdegi qurylys sapasyna jáne turǵyn úılerdiń sáýlettik kelbetine qatysty jıyn ótti. Jıyn barysynda oblys ákimi Asqar Myrzahmetov qurylysy júrgizilip jatqan 15-shi jańa móltekaýdanynyń sáýlettik kelbeti, ondaǵy kópqabatty turǵyn úılerdiń syrtqy beınesi zamanaýı ári kórikti bolýy shart ekenin aıtty.
Basqosýda móltekaýdanda jańadan salynatyn kópqabatty úılerdiń birinshi qabatynda áleýmettik jáne kommersııalyq maqsattaǵy nysandar ornalastyrý máseleleri talqylandy. Jıynda Taraz qalasy ákiminiń orynbasary Saılaýǵaly Baınazarov maqsatty jumystardyń iske asý júıesi týraly baıandady. Onyń aıtýynsha, qazirgi tańda 25 úıdiń jobasy daıyndalýda eken. 2020-2021 jyldary qurylysy júrgiziletin ol kópqabatty turǵyn úılerdiń 12-siniń birinshi qabatttaryna ózgerister engiziledi. Iаǵnı memlekettik organ (tapsyrýshy) jobalaý tapsyrmada birinshi qabatta áleýmettik, kommersııalyq jáne taǵy basqa nysandar bolý qajettigin kórsetedi, soǵan oraı joba-smetalyq qujattama tapsyrmaǵa sáıkes daıyndalyp, qurylys jer teliminiń, fýndament, jertóleniń qundyq úlesteri teń proporsııada bólinedi. Memlekettik satyp alý tek turǵyn páterler jáne úlesine qaraı jertóle kólemine júrgiziledi, memlekettik satyp alýǵa qatysýshy merdiger osyndaı shartqa kelisip qatysady.
Asqar Myrzahmetov tek bes qabatty turǵyn úılermen shektelmeı jeti, toǵyz qabatty úılerdi de salý qajettiligin eskertti. Sol arqyly ınfraqurylym tartý jumystaryn, jer aýmaǵyn únemdeı otyryp, páter qunyn tómendetýge bolatynyn jetkizdi. Oblys ákimi eń bastysy shaǵyn aýdandardaǵy kóppáterli turǵyn úılerdiń birinshi qabattaryn áleýmettik jáne kommersııalyq maqsattaǵy nysandarǵa bere otyryp, ǵımarattardyń syrtqy kórinisin, sáýlettik kelbetin arttyrýdy talap etý kerektigin basa aıtty.
Hamıt ESAMAN,
«Egemen Qazaqstan»
Jambyl oblysy
