Taraptar aldymen óńirlerdiń syrtqy ekonomıkalyq áriptestigine basa mán berdi. Atap aıtqanda, taýar aınalymyn arttyrý, óndiristik kooperasııany kúsheıtý, bilim berý men densaýlyq saqtaý, mádenı qarym-qatynas jáne týrızm jaıy jan-jaqty sóz boldy.
2019 jyldyń alǵashqy toqsanynda Qostanaıda Chelıabi oblysynyń kúnderin ótkizý talqylaýdyń basty taqyrybyna aınaldy. Shara aıasynda eki eldiń iskertoby ókilderiniń kezdesýine múmkindik týyp, áleýmettik-mádenı baılanystarǵa jol ashylmaq. Bul rette taraptar qazirden bastap uıymdastyrý máselelerin qolǵa alý qajettigine kelisti. Taıaý ýaqytta arnaıy jumys toby qurylyp, tıisti is-sharalar jospary naqtylanatyn bolady. Aıtpaqshy, 2017 jyly aımaqtar arasynda Saýda-ekonomıkalyq jáne mádenı áriptestik jónindegi kelisimge qol qoıylǵan bolatyn. Qostanaıda Chelıabi oblysynyń mádenı kúnderin ótkizý sol qujatta kelisilgen máselelerdiń naqty júzege asyrylýy bolyp tabylady.
Aımaqtaǵy týrızmdi damytý maqsatynda Chelıabi men Qostanaı oblystarynyń týrıstik uıym ókilderi jáne blogerler úshin qysqy týrıstik baǵyttar boıynsha aqparattyq týr uıymdastyrylady. Reseı tarapy atalǵan sharaǵa arnap qarjy bólýge daıyn ekendigin jetkizdi. Al jaz aılarynda balalar men jastar týrızmin damytý maqsatynda aımaqtar úsh kúndik týrıstik baǵyttardy qolǵa alý qajettigine ýaǵdalasty. Ol boıynsha qaýipsizdik pen baǵdarlamanyń mazmundylyǵyna aıryqsha den qoıylatyny da áńgimeden tys qaldmady. Budan bólek medısınalyq, ańshylyq-oljalyq týrızm baǵyttaryna da basa mán berilip otyr. Ásirese, ańshylyq-oljalyq týrızm úshin qos óńirdegi tabıǵat, ańdardyń ár alýandyǵy mol múmkindik syılamaq.
Taraptar óndiristik kooperasııa, ınvestısııa tartý jóninde birlesip qolǵa alǵan jobalardy únemi nazarda ustap, aqparat almasyp otyrýǵa kelisti. Kezdesý sońynda 2020 jyly Chelıabi qalasynda ótetin Shanhaı Yntymaqtastyq Uıymy (ShYU) men BRIKS sammıtteri de sóz boldy. Reseılik tarap Qostanaı oblysyn osy jyldyń 4-6 jeltoqsan kúnderi Chelıabide ótkiziletin ShYU aıasyndaǵy forýmǵa qatysýǵa shaqyrdy. ShYU-ǵa múshe elderdiń aımaqaralyq yntymaqtastyǵyn arttyrýǵa sebepshi mundaı forýmdy ótkizý týraly sheshim uıymnyń bıylǵy 9-10 maýsymda Qytaıdyń Sındao qalasynda ótken sammıti kezinde qabyldanǵan bolatyn.
Názıra JÁRIMBET,
«Egemen Qazaqstan»
Qostanaı
