Bul shara Mahambet О́temisov atyndaǵy Batys Qazaqstan memlekettik ýnıversıteti mádenıet jáne óner fakýltetiniń (kórkemsýret-grafıka) qurylǵanyna 40 jyl tolýyn oraı uıymdastyrylǵan. Burynǵy A.S.Pýshkın atyndaǵy Oral pedagogıkalyq ınstıtýty janynan qurylǵan kókrkemsýret-grafıka fakýltetinen 40 jyl ishinde talaı tanymal óner sheberleri túlep ushty. Fakýltettiń qalyptasýyna, stýdentter tárbıesine Tólebaı Ábilov, Ǵalıt Qabdollaev syndy alǵashqy oqytýshylardyń sińirgen eńbegi zor. Osy fakýltettiń tuńǵysh túleginiń biri, keıin osy jerde ustazdyq etken belgili sýretshi, búginde ómirden ótken Aıbar Seıtimovti de jınalǵandar erekshe rızashylyqpen eske aldy. Fakýltettiń ótkeni men búgini týraly tolymdy baıandama jasaǵan Qazaqstan Sýretshiler jáne Eýrazııalyq Dızaınerler odaǵynyń múshesi, BQMÝ oqytýshysy Qýandyq Mádir óz sózinde osy jerden túlep ushyp, búginde elimizdegi tanymal qylqalam sheberine aınalǵan Qaıyr Orazǵalıevti jáne basqalaryn atap ótti.
Konferensııada sondaı-aq qazirgi álemde sýretshige jáne qoǵamdyq qarym-qatynasqa tutastaı saraptama berý, kórkem shyǵarmashylyqty áleýmettik qubylys dep taný joldaryn oılastyrý, kórkem bilim berýdegi uıymdastyrýshylyq jáne ádistemelik máselelerdi ashý jáne olardy sheshý joldary talqylandy. Baıandamashylar JOO-da oryndaýshylyq pánderdi oqytýdaǵy dástúrler jáne jańashyldyqtar týraly, Qazaqstannyń ulttyq mádenıetinde beıneleý óneri jáne dızaındy damytýdyń zamanaýı úrdisteri jóninde pikeir almasty.
Konferensııa aıasynda Oral qalalyq kórme zalynda sýretshilerdiń respýblıkalyq kórmesi ashyldy. Kórmege kórkemsýret-grafıka fakýltetin ár jyldary bitirgen túlekter men belgili qylqalam sheberleriniń úzdik týyndylary qoıyldy. Ol jumystardyń arasynda Oral, Aqtóbe, Aqtaý, Atyraý, Pavlodar qalalarynan kelgen tanymal sýretshilerdiń eńbegi bar.
Kórme ashylýy kezinde Kýrýkshetra (Úndistan) ýnıversıteti beıneleý óneri basqarmasynyń tóraǵasy, fılosofııa óneriniń PhD doktory, professor Ram Vıranjan keskindemeden sheberlik-dárisin ótkizdi.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Rafhat HALELOV
