Oblys ákimi Qyrymbek Kósherbaev aýdanǵa jumys sapary barysynda aýrýhana men mekteptiń ashylý rásimine qatysty.
150 oryndyq aýrýhananyń ǵımaraty 3 qabat, 4 bloktan turady. Onyń ishinde terapııa, hırýrgııa, travmatologııa, pedıatrııa, gınekologııa, ınfeksııalyq jáne dermatovenerologııalyq bólimsheler qyzmet kórsetedi.
Oblys ákimi aýrýhana ujymyn jańa nysannyń ashylýymen quttyqtady.
«Qazirgi tańda Elbasy tapsyrmasymen memlekettik-jekemenshik áriptestik aıasynda memleket pen jeke sektor arasynda uzaq merzimdi yntymaqtastyqty qalyptastyrýǵa baǵyttalǵan jumystar júrip jatyr. Oblys boıynsha bilim, densaýlyq, sport, jalpy áleýmettik salalar boıynsha 52 nysannyń jobasy ázirlenýde. О́tken jyly Qazaly temirjol aýrýhanasynyń bazasynda Aral, Qazaly, Qarmaqshy aýdandarynyń turǵyndary úshin aýdanaralyq ınsýlttyq ortalyq, Baıqońyr qalasynan kópsalaly aýrýhana ashyldy. Qajetti mamandardy rezıdentýraǵa daıyndaý maqsatynda oblys ákiminiń grantyn bóldik, qazir 22 maman oqyp jatyr»,-dedi aımaq basshysy.
Sońǵy eki jylda medısınalyq uıymdardyń materıaldyq-tehnıkalyq bazasy nyǵaıtylyp, barlyq aýdandarda aýysymyna 250 kelýshige arnalǵan emhanalar men 11 medısınalyq beket salyndy. О́tken jyldyń jeltoqsanynda Qazaly aýdandyq ortalyq aýrýhanasy paıdalanýǵa berildi. Oblystyń densaýlyq saqtaý salasynyń materıaldyq-tehnıkalyq bazasyn jaqsartý maqsatynda 48 dárigerlik ambýlatorııa, 7 feldsherlik-akýsherlik beket, 27 medısınalyq beket qurylysy josparlanýda. Medısınalyq uıymdardy arnaıy tehnıkamen qamtamasyz etý boıynsha álemniń kez-kelgen klınıkasymen baılanysqa túsýge múmkindik beretin mobıldi – ota jasaıtyn qondyrǵy ornatyldy. Osy rette aıta keteıik, mundaı qondyrǵymen respýblıkanyń bes klınıkasy ǵana jabdyqtalǵan.
Baqtııar TAIJAN,
«Egemen Qazaqstan»
Qyzylorda oblysy
