Egis naýqanynyń qarsańynda kúrish ósirýmen aınalysatyn sharýashylyqtar úshin Kásipkerler palatasy «Tyńaıtqyshtardy tıimdi paıdalaný jáne kúrish ónimdiligin arttyrý» taqyrybynda semınarlar ótkizgen bolatyn.
- Sol sharaǵa kúrish ósirýdegi jańalyqtar boıynsha agroónerkásiptik keshen salasynyń ǵalymdary, Kúrish zertteý ınstıtýtynyń qyzmetkerleri, oblysqa belgili zeınetker-agronomdar jáne basqa oblystardan kelgen mıneraldy tyńaıtqyshtardy shyǵaratyn kompanııa ókilderi qatysyp, saladaǵy máseleler talqylandy. Sharýalardyń usynys-pikirleri tyńdaldy. Semınar jumysynyń qorytyndysy retinde kúrish alqaptarynan joǵary ónim alý úshin «Tegin keńes berý qyzmetin» bastaý týraly sheshimge keldik. О́ıtkeni, kishi sharýashylyqtarda tájirıbeli agronomdary jáne tehnıkaǵa qyzmet kórsetetin ınjener sekildi mamandar joq, - deıdi Palatanyń Agroónerkásip kesheni bóliminiń bastyǵy Jasulan Serikov.
«Tegin keńes berý» qyzmeti pılottyq rejımde oblysqa qarasty Syrdarııa aýdanynda qolǵa alyndy. Pılottyq joba kóp kúttirmeı-aq óz nátıjesin berdi. Kúzgi jıyn-terinde Syrdarııa aýdanynyń shaǵyn sharýashylyqtary ónimdi ádettegiden 10-15 sentnerge artyq jınady. Bıyl oblys boıynsha kúrishtiń ortasha ónimdiligi gektaryna 50-55 sentner bolsa, jobaǵa belsendi qatysqan sharýashylyqtar kúrishti 67 sentnerge deıin jınady.
Búginde Kásipkerler palatasy «Tegin keńes berý» qyzmetin oblystyń ózge aýdandarynda da engizýdi josparlap otyr.
Baqtııar TAIJAN,
«Egemen Qazaqstan»
Qyzylorda oblysy
