Jańa qoıylymnyń keıipkerleri – qazaqtyń ańyzǵa aınalǵan qos tulǵasy kompozıtor Nurǵısa Tilendıev pen aqyn Muqaǵalı Maqataev. Pesa avtory Nartaı Saýdanbekuly bul shyǵarmany erekshe tebirenispen jazǵanyn aıtady. Sııasy keppegen, áli esh sahnada qoıylmaǵan dúnıeni Batys Qazaqstan oblystyq teatrynyń basshysy Qýanysh Amandyqov at-túıedeı qalap alypty. Alataý alyptarynyń beınesin Aqjaıyqta tiriltken – Qalıbek Qýanyshbaev atyndaǵy Astana Memlekettik akademııalyq Qazaq mýzykalyq drama teatrynyń rejısseri, Qazaqstannyń eńbek sińirgen qaıratkeri Nurlan Jumanııazov.
Shyǵarmaǵa aqyn ómiriniń sońǵy kúnderi, qalamger men sazgerdiń shyǵarmashylyq tandemi, «Qustar qaıtyp barady», «Sarjaılaý», «Esińe meni alǵaısyń...» ánderiniń shyǵý tarıhy ózek bolǵan. Basty rólderdi Oral teatrynyń tanymal tarlandary – Qazaqstannyń eńbek sińirgen ártisi, Memlekettik syılyqtyń laýreaty Serdesh Qajymuratov (Nurǵısa) pen Qazaqstannyń eńbek sińirgen qaıratkeri Erbol Esendosov somdady. Dramada sazgerdiń jary Darıǵany somdaǵan Aqmaral Amandyqova men Muqaǵalı jyryn jatqa soǵatyn «aıyqtyrǵysh qyzmetkeri» Salaýat Túmenovtiń oıyny da erekshe qanyq, nanymdy shyqqan. Qoıylymnyń mýzykalyq keńesshisi – «Qurmet» ordeniniń ıegeri, Mádenıet salasynyń úzdigi Erkin Nurymbetov pen hormeıster Natalıa Sanbaeva bolsa, sahnany sándegen – qoıýshy sýretshi Murat Mámbetov. Sahnada óner kórsetken hor kapellasynyń óneri ólmes jyr men óshpes saz týraly shyǵarmanyń shyraıyn kirgizdi.
– Qazaqtyń mańdaıyna bitken uly tulǵalardyń ómiri, taǵdyry kóz aldymyzǵa kelgendeı boldy. Osy kórinisti áserli jetkizgen akterlerdiń sheberligine rızamyz. Sondaı-aq qoıylymdy sahnalaǵan rejısser, ózimizdiń jerlesimiz Nurlan Jumanııazovqa, avtor Nartaı Saýdanbekulyna Aqjaıyq kórermenderi atynan rızashylyǵymyzdy bildirip, qazaq saltymen shapan jabamyz, – dedi premera sońynan sahnaǵa kóterilgen Batys Qazaqstan oblystyq mádenıet basqarmasynyń basshysy Qadyrbolat Musaǵalıev. Bul qurmet osy premerany tamashalaýǵa arnaıy kelgen tanymal akter Qýandyq Qystyqbaevqa da kórsetildi.
Aıta keteıik, Oral teatrynda qazaqstandyq, tipti sheteldik rejısserler arnaıy shaqyrylyp, qoıylym qoıýy – kóp jyldan beri qalyptasqan dástúr. Máselen, búgingi premeranyń rejısseri Nurlan Jumanııazovtyń ózi buǵan deıin osy sahnada amerıkalyq dramatýrg Vına Delmardyń «Baıansyz baq» dramasy men Shyńǵys Aıtmatovtyń «Aq kemesin» sahnalaǵan. «Mundaı áriptestik teatr ujymynyń shyǵarmashylyq áleýetiniń ósýine, ózara tájirıbe almasýyna oń áser etedi», deıdi teatr basshysy Qýanysh Amandyqov.
Qazbek QUTTYMURATULY,
«Egemen Qazaqstan»
Batys Qazaqstan oblysy
