Kórmeniń ashylý saltanatynda sóz alǵan Ulttyq mýzeı dırektorynyń orynbasary Jáken Taımaǵambetov: «Memleket basshysy bir sózinde: «Bir beldeý, bir jol» – jańa paradıgma, jańa deńgeıdegi yntymaqtastyq júıesi» degen bolatyn. Búgingi kórmeniń «Bir beldeý, bir jol» bastamasynyń bes jyldyǵyna oraı uıymdastyrylǵanyn erekshe atap ótkim keledi. Ulttyq mýzeı Qazaqstandaǵy elshiliktermen birlese otyryp, kóptegen is-sharalar uıymdastyrýda. Qazaqstandaǵy Qytaı elshiligimen aldaǵy ýaqytta da mańyzdy jobalardy júzege asyramyz degen oıdamyz. Kórmege usynylǵan sýretter erekshe tańdanyspen, qyzyǵýshylyqpen túsirilgen. Bul sýretter sizderdi de beıjaı qaldyrmaıtyny anyq», – dep óz pikirin bildirdi.
Al QHR-dyń Qazaqstandaǵy Tótenshe jáne ókiletti elshisi Chjan Sao: «Bul shara Qytaıdyń reforma jáne ashyqtyq saıasatyna 40 jyl tolýyna oraı uıymdastyrylyp otyr. Búgingi kórme eki halyq arasyndaǵy dostyq pen yntymaqtastyqtyń jarqyn kórinisi deýge bolady. Munda usynylǵan sýretterden qytaı halqynyń kúndelikti turmys-tirshiligin, ómir saltyn, dástúrlerin tanyp, ondaǵy túrli qalalardyń ásem kórinisterin tamashalaýǵa múmkindik bar. Zamanaýı Qytaıdyń kelbeti kóńilderińizden shyǵady dep senemin», – dedi.
Kórmege barlyǵy 700-den astam foto jınalyp, osylardyń arasynan eń úzdik 100 fotosýret tańdalyp, atalǵan kórmege qoıylypty. «Sizder osy sýretter arqyly qazaqstandyqtardyń kózimen tańǵajaıyp Qytaıdyń ásem kórinisterin tamashalaı alasyzdar», deıdi uıymdastyrýshylar.
Qýat ÝATQAN,
jýrnalıst
