Sıfrlandyrýdyń arqasynda «Atameken-Agro» aksıonerlik qoǵamynyń aýqymdy isi tabysty arnada toǵysyp jatqandyǵyn búginde kóz kórip otyr. Aýylsharýashylyǵy ónimderin molynan óndirý men óńdeý birneshe esege kóbeıgen. Astyqty Aqmola oblysynda sıfrlandyrýdy óz isterine negizgi serpin retinde alyp, túbegeıli qoldanysqa engizip otyrǵan, sóıtip aýylsharýashylyǵy ónimderin molynan óndirýge baǵyt alyp otyrǵan ujymnyń biri – «Atameken-Agro» aksıonerlik qoǵamy. Tabys syry − eń aldymen sıfrlandyrý, negizinen ilkidegi tájirıbe men jańa zamanǵy jańalyqtardy ushtastyra bilýinde. Elbasy Nursultan Nazarbaev eńbek ónimdiligin ulǵaıtyp, aýylsharýashylyǵynyń óńdelgen ónimin bes jyl ishinde 2,5 ese ulǵaıtý týraly mindet júktegeni belgili. Búgingi tańda oblys qana emes, elimiz boıynsha aýylsharýashylyǵy salasynda sıfrlandyrý boıynsha kósh bastap kele jatqan kásiporynnyń Elbasy tapsyrmasyn buljytpaı oryndaýǵa tolyq múmkindigi bar.
Aǵymdaǵy jyly «Atameken-Agro» kompanııasy elimiz boıynsha ótkizilgen agroónerkásip keshenin sıfrlandyrý baıqaýynda jeńimpaz retinde tanyldy. Qazirgi tańda astyq egiletin alqaptarǵa ǵaryshtan monıtorıng júrgizý múmkindigine ıe. Osylaısha barlyq agrotehnıkalyq sharalarǵa tıisti saraptama jasaı alady. Onyń ústine alqaptar kestesin belgileý, qaı tanapqa qandaı tuqym sińirilgendigin, onyń ónimdiligin, topyraqtyń qunaryn elekten ótkizip, eń sońynda óndirilgen ónimdi saqtaý men óńdeý úrdisterin de osy sıfrlandyrýdyń arqasynda baqylaı alady. Búgingi tańda ilkimdi jańalyqtyń arqasynda eńbek ónimdiligi eki ese kóbeıgen.
Kompanııanyń jer kólemi kóp. Naqtyraq aıtsaq, 260 myń gektar jerdi quraıdy. Osynshama alqapqa egiletin daqyl túri de az emes. Máselen, keıbir sharýashylyqtar tek bıdaı, arpa egýge mamandansa, bul kásiporyn jıyrmadan astam daqyl túrin ósirýde. Kompanııa mamandarynyń aıtýyna qaraǵanda, jyl saıyn alqaptardyń qunaryn, egilgen tuqymnyń qanshalyqty tıimdi ekendigin aqyl tarazysyna salyp ekshep otyrý kerek. Bul ulan-ǵaıyr jumysty sıfrlandyrýsyz atqarý múmkin emes. Onyń ústine qolda bar tehnıkalardy utymdy paıdalanǵan jón.
Jerdi ıgerý, agrotehnıkalyq sharalardy ýaqtyly atqarý eń aldymen materıaldyq-tehnıkalyq múmkindikke baılanysty ekendigi álmısaqtan belgili. Sondyqtan munda mashına-traktor parkin jańalaýǵa jete mán berilip otyr. Sońǵy jyldary kompanııa 270 aýylsharýashylyǵy tehnıkasyn satyp aldy. Onyń ishinde qýaty joǵary astyq kombaındary, egis keshenderi, topyraq óńdeıtin agregattar men eńbek ónimdiligi joǵary traktorlar bar.
О́nim molaıǵan soń ony saqtaý máselesine de jetkilikti nazar aýdarylǵan. Sońǵy jyldary astyq saqtaıtyn qambalardyń da múmkindigi molaıyp keledi. Búginde 500 myń tonna daqyl saqtaýǵa qaýmetteri tolyq jetedi. Esepti kezeń ishinde 7 mıllıard teńgeden astam ınvestısııa quıyldy. Osy ınvestısııanyń arqasynda daqyl óndirý mádenıeti kóp-kórim jaqsaryp qaldy. О́nim kólemi de óse tústi. Máselen, ótken jyldardaǵy qol jetkizgen tabys deńgeıinen 25 paıyz artyq ónim jınaý múmkindigi týyp otyr. 2017 jyly taýarly ónim kólemi odan arǵy jylmen salystyrǵanda 136,5 myń tonnaǵa nemese 41 paıyzǵa kóbeıdi. Sóıtip uzyn-yrǵasy 463 myń tonnany qurady.
Tabystyń taıqazanyn tasytqan kompanııanyń jumys yrǵaǵynda kóp qupııa da joq. Bary zaman talabyna saı sıfrlandyrý úrdisin qýattaýy. Endigi arada bir kezde ilkimdi sanalǵanymen, kónergen ádisterdi qoıa turyp, tıimdiligi kózge uryp turǵan jańanyń jalyna jarmasqan lázim. Bul aýylsharýashylyǵyn túbegeıli tıimdi arnaǵa buratyn sıfrlandyrý tehnologııasy.
Baıqal BAIÁDIL,
«Egemen Qazaqstan»
Aqmola oblysy
