Qazaqtyń músin ónerinde ózindik qoltańbasyn qaldyrǵan ári erekshe týyndylarymen elimiz ǵana emes, shetelderge de málim bolǵan Baqytjan Ábishev esimi kóptegen eskertkish-músindermen baılanysty.
Jasybaı batyr, Muhtar Áýezov, ál-Farabı, Shyǵanaq Bersıev beınelerimen qatar Almatydaǵy Toqash Bokın, Mahambet, Kúlásh Báıseıitovaǵa qoıylǵan músinder, Jańaqorǵandaǵy «Uly Otan soǵysynyń qurbandary», Atyraý qalasyndaǵy Isataı-Mahambet músini tikeleı avtor esimimen tyǵyz baılanysty. Al «Olımpıes» týyndysy Shveısarııadaǵy Lozanna qalasyndaǵy Olımpıadalyq komıtettiń shtab-páterinde ornalastyrylsa, «Kúıshi» músini Germanııada, «Tomırısi» Máskeýde saltanat quryp tur.
Estelik keshti belgili synshy Álııa Bópejanova júrgizdi. Músinshiniń jubaıy, Qazaqstannyń eńbek sińirgen ártisi Shámshágúl Mendııarova esteligimen bólisip, jeke shyǵarmashylyq jumystary, atqarylmaı qalǵan jobalary toptastyrylǵan «Ábishev álemi» kitabyn tanystyrdy. Qazaqstannyń halyq ártisi Núketaı Myshbaeva ol týa bitken talant, ardaqty azamat edi, dep «Shynaıy shyǵarmashylyq talantty oqytpaıdy, ol adamǵa týa bitedi. Mine, osy bir erekshe talanat Baqytjannyń boıyna bitti. Isine myǵym, asa kóńildi júretin azamat edi» degen júrekjardy pikirin bildirdi. Al Bolat Ábishev baýyryna degen saǵynyshy sheksiz ekenin bildirip, shańyraqtyń shamshyraǵy Shámshágúl jeńgesine alǵysyn bildirdi. Músinshi Tileýberdi Bınashev Baqytjan Ábishev músin óneriniń shyńynda turǵan Qulageri degen pikirimen bólisti.
Shyǵarmashylyǵy tilekeı Qulagermen sıpatalatyn ǵajaıyp talant ıesi ómirden ozǵanymen artynda qundy murasyn qaldyrdy. Eren eńbeginiń arqasynda Jambyl Jabaev atyndaǵy halyqaralyq syılyqtyń laýreaty, «Eren eńbegi úshin» medaliniń ıegeri atandy.
Eske alý is-sharasyna belgili qoǵam jáne mádenıet qaıratkerleri, BAQ ókilderi men stýdentter qatysty.
Elvıra SERIKQYZY,
«Egemen Qazaqstan»
ALMATY
