Is-sharaǵa Qarýly Kúshterdiń ardagerleri men áskerı barlaý organdarynyń ókilderi qatysty. Qurylǵan sátten bastap barlaý ınstıtýty basshylyq etýdiń tıimdi júıesin, onyń jaýyngerlik organdarynyń durys uıymdastyrylǵan túrde qurylýyn, ártúrli jaýyngerlik is-qımyldardy qamtamasyz etýde olardyń nátıjeli qoldanylýyna basymdyq berdi. Oǵan qosa aqparattyq tehnologııalardyń damýymen ártúrli barlaý túrleri sanynyń ulǵaıýy baıqalýda.
– Táýelsizdik jyldary ishinde Elbasy – Qarýly Kúshterdiń Joǵarǵy Bas qolbasshysy Nursultan Ábishuly Nazarbaevtyń basshylyq etýimen Qarýly Kúshter elimizdiń berik qalqanyna aınaldy. Búginde halyqaralyq sharttardyń joıylýy, saıası turaqsyzdyq, terrorızm aktileri, áskerı is-qımyldardyń aqparattyq, kıbernetıkalyq ádisteri qoldanylýynan álemge eleýli qaýip-qater týyp tur. Osy rette áskerı barlaý memleketimizdiń ulttyq qaýipsizdigin qamtamasyz etý júıesiniń jalpy qurylymynda mańyzdy rólge ıe, – dedi Qorǵanys mınıstri.
Sondaı-aq saltanatty shara barysynda qorǵanys vedomstvosynyń basshysy áskerı barlaý organdaryn damytýǵa úles qosyp júrgen barlaý bólimsheleri áskerı qyzmetshileri qyzmetiniń kúrdeliligi men mańyzdylyǵyn atap ótti. Qorǵanys mınıstri olardyń kásipqoılyqtaryn saýatty basqarý jáne sheber uıymdastyrýmen ushtastyrýda óz isine degen adaldyqtaryn atap ótip, ardagerlerge erekshe iltıpat pen alǵys bildirdi.
Is-shara sońynda anaǵurlym erekshe kózge túsken ofıserler men serjanttar vedomstvolyq medaldarmen jáne baǵaly syılyqtarmen nagradtaldy.
Serik ÁBDIBEK,
«Egemen Qazaqstan»
