Qos el arasyndaǵy strategııalyq áriptestik baılanystardy nyǵaıtý jónindegi alǵashqy forým 2003 jyly Omby qalasynda ótip, sodan beri mundaı iskerlik kezdesýler shekaralas aımaqtarda júıeli túrde jalǵasyp keledi. Bul joly kún tártibine «Qazaqstan men Reseıdegi týrızmdi damytýdyń jańa tásilderi men úrdisteri» atty ózekti taqyryp shyǵaryldy.
Birinshi kúni ámbebap tennıs ortalyǵynda Qazaqstan–Reseı týrıstik kórmesi uıymdastyrylyp, saltanatty sharanyń ashylýyna Mádenıet jáne sport mınıstri Arystanbek Muhamedıuly, Reseıdiń týrızm jónindegi federaldyq agenttiginiń basshysy Oleg Safonov, oblys ákimi Qumar Aqsaqalov, ulttyq kompanııalardyń jetekshileri, isker toptar, mınıstrlikter men vedomostvolardyń jaýapty ókilderi, kásipkerler, týroperatorlar qatysty.
Mınıstr óz sózinde Qazaqstan men Reseı arasynda ózara senimge, dostyqqa negizdelgen yqpaldastyq strategııasynyń nyǵaıa túskenin, onyń ishinde týrızm keń aýqymdylyǵymen sıpattalatynyn, búginde eldiń básekelestik qabylettiligin aıqyndaıtyn sheshýshi faktorǵa aınalǵanynatap ótti.
Q.Safonov eki el arasynda dostyqqa, túsinistikke qurylǵan qarym-qatynastyń strategııalyq mańyzyna toqtaldy.
Q.Aqsaqalov forýmǵa qatysýshylardy aıtýly oqıǵamen quttyqtap, soltústikqazaqstandyqtarǵa zor senim artylǵan úlken mártebe ekenin tilge tıek etti.
Forýmǵa qatysýshylar kórmeni aralap, onda qoıylǵan eksponattarmen tanysty. Týrıstik kompanııalar óz ónimderi men qyzmet túrlerin, ınvest jobalaryn usyndy.
BAQ ókilderimen ótken brıfıngte «Kazakh Tourism UK» basqarma tóraǵasynyń orynbasary Tımýr Dúısenǵalıev, Reseıdiń týrızm jónindegi federaldyq agenttiginiń basshysy Oleg Safonov, oblys ákiminiń orynbasary Dáýren Jandarbek týrızmniń suranysqa ıe zamanaýı túrlerine serpin berý, aýqymdy potensıaldyq múmkinshilikterdi utqyrlyqpen paıdalaný, týrıstik ónimderdi ótkizý, jarnamalaý,talapqa saı bezendirý máseleleri jaıly baıandady.
Forým sheńberinde «Týrızmdi damytýdaǵy kásipkerliktiń belsendi róli», «Týrızm salasyn sıfrlandyrýdaǵy qazirgi trendter», taǵy basqa taqyryptar boıynsha paneldik sessııalar uıymdastyrylyp, oı-pikirler almasyldy.
Forýmnyń ekinshi kúni eki memleket prezıdentteriniń qatysýymen plenarlyq otyrys ótedi. Birqatar mańyzdy máseleler talqylanyp, yntymaqtastyqty odan ári nyǵaıtýǵa baǵyttalǵan qujattar qabyldanady.
О́mir ESQALI,
«Egemen Qazaqstan»
Soltústik Qazaqstan oblysy
