Memleket basshysy Soltústik Qazaqstan oblysynyń ákimi Q.Aqsaqalovtyń óńirdegi áleýmettik-ekonomıkalyq ahýaldyń damýy, ındýstrııalyq jobalardyń iske asyrylýy jáne joldaý aıasyndaǵy tapsyrmalardyń oryndalýy jónindegi esebin tyńdady.
Nursultan Nazarbaev oblys ákiminiń baıandamasynan keıin Qazaqstan Respýblıkasy men Reseı Federasııasynyń óńiraralyq yntymaqtastyǵynyń forýmyna ázirlik aıasynda aımaqty damytý baǵdarlamasynyń tıimdi iske asyrylyp jatqanyn atap ótti.
– Petropavl qalasyn kórkeıtý maqsatymen kóp jumys atqaryldy. Oblystyń ekonomıkalyq kórsetkishteri qalypty. О́sim qarqyny respýblıka boıynsha ortasha kórsetkishten joǵary, – dedi Elbasy.
Sonymen qatar, Memleket basshysy oblystyń agrarlyq áleýetine toqtalyp, bul óńirde aýyl sharýashylyǵy salasyn damytý qajettigin aıtty.
– Elimizdegi aýyl sharýashylyǵy ónimderin óńdeý isi kóńil kónshiterlikteı emes. Men aýyl sharýashylyǵyndaǵy eńbek ónimdiligin eki ese kóterý jóninde mindet qoıdym. Bul sizderdiń oblystaryńyzǵa tikeleı qatysty. Qaıta óńdeý men eksportty ilgeriletý arqyly ǵana ónimdilikti arttyrýǵa bolady. Sizder úshin jańa tutyný naryqtary ashyldy, – dedi Qazaqstan Prezıdenti.
Elbasy turǵyn úı jáne ınfraqurylym nysandaryn salý, áleýmettik baǵdarlamalardy iske asyrý jumystarynyń nátıjelerine de toqtaldy. Atap aıtqanda, 2018 jyly óńirdiń 6 myńnan astam turǵyny baspanamen qamtamasyz etilip, 150 myńnan astam jumysshynyń jalaqysy kóteriledi, sondaı-aq óńirlik mańyzy bar joldar jóndeýden ótkiziledi.
Sońynda Nursultan Nazarbaev óńir jurshylyǵymen kezdesti. Oblys turǵyndary áleýmettik salaǵa qatysty baǵdarlamalar qabyldap, halyqqa udaıy qamqorlyq kórsetip kele jatqany úshin Memleket basshysyna alǵys bildirdi.
