Senat Tóraǵasynyń orynbasary S.Gromov Kaspıı teńiziniń quqyqtyq mártebesi týraly konvensııaǵa qol qoıylǵan Kaspıı mańy memleketteri basshylarynyń Aqtaý sammıtiniń qorytyndylaryn Astana joǵary baǵalaıtynyn atap ótti.
Qazaqstan Prezıdenti Nursultan Nazarbaev atap ótkendeı, Konvensııa teńizdiń sýyn, túbin, qoınaýyn, tabıǵı resýrstary men áýe keńistigin qosa alǵanda osy sý aıdynyna qatysty taraptardyń barlyq quqyqtary men mindettemeleri aıqyndalǵan jáne rettelgen «Kaspıı teńiziniń konstıtýsııasy» bolyp tabylady.
Bul qujat teńizdegi quqyqtar men egemendiktiń arajigin ajyratýǵa, qoınaýyn paıdalaný, tranzıt pen tasymaldaý quqyqtaryn júzege asyrýǵa, sý asty qubyrlary men jelilerdi júrgizýge, tarıǵı orta men bıologııalyq resýrstardy qorǵaýǵa baılanysty aýqymdy máselelerdi qamtıdy.
Senat Tóraǵasynyń orynbasary osynaý erekshe qujatqa qol qoıý jónindegi kelisimge kelýdegi Reseı men Irannyń úlesin joǵary baǵalady.
- Konvensııany bizdiń parlamentterimizdiń ratıfıkasııalaǵany mańyzdy bolyp otyr. Bıylǵy 6 qarashada Konvensııany ratıfıkasııalaý jónindegi qujattar toptamasy Qazaqstan Respýblıkasynyń Úkimetinde qaralǵanyn habarlaımyn. Konvensııany ratıfıkasııalaý týraly zań jobasyn Úkimet aldaǵy eki aptada Parlament Májilisine beredi dep kútip otyrmyz, dedi S.Gromov.
Otyrysta Reseı Federasııasy Federaldyq Jınalysy Federasııa Keńesi Agrarlyq-azyq-túlik saıasaty jáne tabıǵatty paıdalaný komıteti tóraǵasynyń orynbasary Sergeı Beloýsov jáne Iran Islam Konsýltatıvtik Keńesi Tóraǵasynyń birinshi orynbasary Masýd Pezeshkıan Konvensııany ýaqytynda ratıfıkasııalaýdyń mańyzy týraly aıtty.
Otyrys barysynda eki eldiń senatorlary Biryńǵaı ekonomıkalyq keńistik aıasynda Mańǵystaý oblysy men Reseıdiń Daǵystan Respýblıkasyn mysal ete otyryp, shekaralyq aımaqtardy damytýdy, Kaspııdegi týrızm, ekologııa men bıoresýrstardy qorǵaý salasyndaǵy yntymaqtastyqty damytý máselelerin talqylady.
S.Gromov pen Iran Islam Konsýltatıvtik Keńesi Tóraǵasynyń birinshi orynbasary Masýd Pezeshkıannyń kezdesýinde parlamentaralyq yntymaqtastyq jáne ekijaqty qatynastardy, onyń ishinde parlamentaralyq únqatysýlardy odan ári nyǵaıtý máseleleri talqylandy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
