Festıval sheńberinde Sh.Aımanov atyndaǵy «Qazaqfılm» kınostýdııasynda jaryq kórgen «Jaýjúrek Myń Bala», «Anaǵa aparar jol», «Qunanbaı», «Oralman» jáne «Jańǵaq tal» fılmderi kórsetildi.
Festıvaldiń ashylý saltanatynda Qazaqstannyń Rýmynııadaǵy Elshisi Dáýlet Batyrashev sóz sóılep, rýmyn aýdıtorııasyn otandyq kınoındýstrııa ónimderimen tanystyrý sharasy eki eldiń mádenı-gýmanıtarlyq yntymaqtastyǵynyń damýyna jáne halyqtary arasynda rýhanı jaqyndasýyna yqpalyn tıgizetinin aıtty.
Festıvalge áıgili otandyq akter Asylhan Tólepov qatysyp, kórermenderge «Jaýjúrek Myń Bala» fılminiń túsirilýi týraly aıtyp berdi. Akter bul is-shara rýmyn kórermenderine qazaq halqynyń tarıhy, mádenıeti jáne dástúrimen jaqyn tanysýyna múmkindik beretinin atap ótti.
Sondaı-aq festıvalge jergilikti turǵyndar, qoǵamdyq qaıratkerler, úkimet, isker jáne akademııalyq orta ókilderi, sondaı-aq, Klýj-Napoka qalasynda oqyp júrgen qazaqstandyq stýdentter qatysty. Olar Qazaq kıno festıvali qalanyń mádenı ómirinde erekshe qubylys bolǵanyn aıtyp, Rýmynııanyń Birigýine júzjyldyq mereıtoıy qarsańynda ótip jatqanyn atap ótti.
Aıta ketsek, Qazaq kınosynyń festıvali Rýmynııanyń taǵy da bir iri qalasy – Konstansada ótti. Bul kórsetilimde «Qazaq handyǵy: Almas qylysh», «Stalınge syılyq», «Birjan Sal» jáne «Jat» fılmderi halyq nazaryna usynyldy.
Konstansa mýnısıpalıtetiniń jáne oblystyq ákimshiliktiń ókilderi, eki eldiń halyqtaryn jaqyndastyrý maqsatynda osyndaı mádenı is-sharalardy ótkizýdiń mańyzdylyǵyn atap ótti. Rýmyn mádenıet qaıratkerleri Qazaqstan men Rýmynııa ártisteriniń qatysýymen birlesken qoıylymdar ótkizý týraly usynystaryn aıtty.
Sharaǵa rýmyndyq iskerlik orta, buqaralyq aqparat quraldary, qazaq dıasporasy ókilderi jáne qala turǵyndary qatysty. Otandyq fılmdermen shabyttanǵan rýmyn kórermenderi qazaqstandyq rejısserlerdiń jumysynyń joǵary deńgeıin basa aıtyp, qazaqstandyq kıno mektebin erekshe baǵalady.
Esterińizge sala keteıik, Rýmynııada Qazaq kınosynyń birinshi festıvali 2017 jyly qarashada aıynda ótkizilip, Qazaqstan men Rýmynııa arasyndaǵy dıplomatııalyq qatynastardyń 25-jyldyq mereıtoıyna oraılastyrylǵan bolatyn.
