Rıo Olımpıadasynyń júldegeri, álem chempıony degen dardaı ataǵy bar áınili sportshyǵa biz úlken senim artqan edik. Alaıda Aleksandr Zaıchıkov bıylǵy jyldyń basty dodasyna daıar bolmaı shyqty. Báseke barysynda 165 kılony julqyp, 195 kılony serpe kótergen ol 360 kılolyq kórsetkishpen 9 orynda qalyp qoıdy. Bul salmaqta Irannyń aýyr atleti Álı Hoshemı ozdy.
Byltyrǵy jylǵy álem chempıony bul joly 396 (179+217) kılolyq ziltemirdi eńserip, bas júldeni qanjyǵasyna baılady. Kúmis medal Dmıtrıı Chýmaktyń enshisinde. Ýkraınanyń myqtysy 390 (176+217) kılony eńserdi. Dál osyndaı nátıje kórsetken Irannyń taǵy bir sportshysy Reza Beıralvand qola medaldi moınyna ildi.
Al «V» tobynda 81 kılo salmaq dárejesinde óner kórsetken qazaqstandyq ziltemirshi Raýshan Meshithanovanyń birinshi oryndy ıelegeni jaıynda keshe habarladyq. «A» tobyndaǵy jarys aıaqatlǵannan keıin qazaq qyzynyń julqyp kóterý jattyǵýynda kúmis medaldi ıelengeni belgili boldy. Esterińizge sala keteıik, Ashhabadta Raýshan 108 kılony julqyp jáne 115 kılony serpe kóterdi. Qossaıystaǵy nátıjesi – 223 kılo.
Ǵalym SÚLEIMEN,
«Egemen Qazaqstan»
