Qalalyq ákimdiktiń málimetinshe, Taraz qalasyndaǵy «Shóldala» alqabyna gaz qubyryn jaqyndatý qurylysyna 2017 jyly respýblıkalyq bıýdjetten 623,2 mln teńge, oblystyq bıýdjetten 61,3 mln teńge, barlyǵy 682,2 mln teńge bólingen. Merdiger mekeme – «Monolıt-Dızaın» JShS. Jaýap hatta qurylys-montajdaý jumystary 2017 jyldyń 1 sáýirinde bastalyp, 31 shildesinde aıaqtalǵany jáne gaz qubyrynyń uzyndyǵy 24,355 shaqyrym ekeni jazylǵan.
– «Shóldala», «Qumshaǵal», «Kóltoǵan», «Qyzyl-abad» jáne 28 saıajaı alqaptarynyń ishki oramdyq taratýshy jelileriniń qurylysy» jobasynyń jobalaý-smetalyq qujattamasyn ázirleýge 2018 jyly qalalyq bıýdjetten 9,0 mln teńge bólingen. Qazirgi ýaqytta alǵashqy derekter qory jınastyrylýda. Jobalaý-smetalyq qujattama ázirlenip, memlekettik saraptamadan ótkennen keıin respýblıkalyq bıýdjetke qurylys-montajdaý jumystaryn qarjylandyrýǵa ótinim joldanatyn bolady. Sonymen qatar turǵyndar tutynylǵan elektr energııasyna zańdy tulǵa retinde qosymsha qun salyǵyn esepke alǵanda 1 kVt saǵat úshin 22,27 teńgeden tólem júrgizip keledi. Jeke tulǵalar úshin bekitilgen tarıf kólemi qosymsha qun salyǵyn esepke alǵanda 1 kVt saǵat úshin 14,95 teńge bolyp bekitilgen. Elektr energııasyn paıdalaný boıynsha aı saıynǵy tólem jetkizýshi usynǵan shot-faktýra negizinde júrgizilýde. Saıajaı turǵyndary elektr energııasyn kooperatıvtiń elektr jelilerinen alyp otyrǵandyqtan, elektr energııasynyń aqysyn kooperatıvke tólep otyr, – deıdi Kenjebek Oljabaı.
Maqala jazý barysynda shaǵyn aýdan turǵyndarymen kezdeskenimizde, olar qoǵamdyq kólik máselesin aıta kelip, qalaǵa kún saıyn qatynaý qıyndyq týǵyzyp otyrǵanyn jetkizgen edi. Bul oraıda qala ákimdigi tarapynan birqatar jumystar qolǵa alynǵan. Ákim orynbasarynyń aıtýynsha, búgingi tańda «Qumshaǵal» alqabyna №54 avtobýs baǵyty 8 kestemen, júrý aralyqtary 20-22 mınýttan jergilikti halyqqa qyzmet kórsetýde eken. Sonymen qatar aǵymdaǵy jyly Hımık, Veteran saıajaılarynan bastap Shóldala, Qumshaǵal, Kóltoǵan alqaptary arqyly móltek aýdandarǵa, №1 qalalyq aýrýhanaǵa qatynaıtyn №61 avtobýs baǵytynyń qyzmetin uıymdastyrý jóninde konkýrs ótkizilipti. Baǵyttyń júrý kestesi jergilikti turǵyndarmen kelisilip, búginde baǵyt tańǵy mezgilde úzdiksiz qatynaýda. Qazan aıynan bastap jolaýshylar aǵymynyń kóbeıýimen atalǵan baǵytqa qosymsha keste sandaryn qosý da josparlanypty.
Sonymen qatar turǵyndar bir ataýdyń birneshe jerde kezdesetinin, tipti jedel járdem kóliginiń ózi berilgen mekenjaıdy tappaıtynyn aıtqan edi. Bul oraıda Kenjebek Oljabaı Taraz qalasyndaǵy saıajaı alqaptary, saıajaı kooperatıvteri, garajdyq kooperatıvterdegi qaıtalanatyn 225 kóshe, 1 shaǵyn aýdan boıynsha Úkimettiń 2014 jylǵy 24 aqpandaǵy №138 qaýlysyna sáıkes jumystar júrgizilip, respýblıkalyq onomastıka komıssııasynyń 2017 jylǵy 27 qarashadaǵy oń qorytyndysyna ıe bolǵanyn málimdedi. Qazirgi tańda bul másele Jambyl oblysy ákimdigi men Jambyl oblystyq máslıhatynyń qaraýyna engizilgen. Atalǵan kóshelerdiń anshlagtaryn jańalaýǵa qalalyq bıýdjetten 10 mln teńge qarjy bólinip, birlesken qaýly jáne sheshim shyqqan jaǵdaıda anshlagtaryn aýystyrý jumystary júrgiziledi.
– Aýyzsý qoryn anyqtaý úshin ınjenerlik-geodezııalyq jumystar júrgizilýde. Sonymen qatar «Qumshaǵal» sý bógeti ǵımaratyn qaıta jańǵyrtý jáne «Shóldala» alqabyna sorǵy stansasymen jańa sý bógeti ǵımaratynyń qurylysyn júrgizý jumystary qarastyrylýda. Osy sharalar aıaqtalǵannan keıin «Shóldala» men «Qumshaǵal» alqaptaryn sýmen qamtý úshin jobalaý-smetalyq qujattama ázirlenetin bolady. 2019-2021 jyldary atalǵan jelilerdiń qurylysyn júrgizý josparlanyp otyr.
Al 2018 jyldyń 15 tamyz kúni atalǵan aýmaqtyń turǵyndarymen qala ákimdiginiń mamandary jınalys ótkizip, kóterilgen máseleler boıynsha turǵyndarǵa túsindirý jumystaryn júrgizdi, – deıdi Kenjebek Oljabaı.
Hamıt ESAMAN,
«Egemen Qazaqstan»
Jambyl oblysy
