Memlekettik hatshy Gúlshara Ábdiqalyqova tóraǵalyq etken jıynǵa Parlament depýtattary, ortalyq jáne jergilikti atqarýshy organdardyń jetekshileri, belgili qoǵam qaıratkerleri men ǵalymdar qatysty.
Otyrysty ashqan Gúlshara Ábdiqalyqova atalǵan salada belgili bir rettilik qalyptasqanyn aıta kele, azamattardyń memlekettik rámizderge degen qurmet sezimin qalyptastyrý baǵytynda aqparattyq túsindirý jumystaryn júıeli túrde ilgeriletý, patrıottyq tárbıeniń rólin, ásirese jastar arasynda odan ári jalǵastyrý qajet ekenin jetkizdi.
«Elbasy Nursultan Nazarbaev taıaýdaǵy Joldaýynda: «Árbir qazaqstandyq júrgizilip jatqan reformalardyń mánin, olardyń Otanymyzdy órkendetý jolyndaǵy mańyzyn jete túsinýi tıis. Reformalardy tabysty júzege asyrý úshin qoǵamymyzdyń ortaq maqsatqa jumylýy asa mańyzdy», dep atap ótken bolatyn. Ol – Qazaqstan azamattarynyń el men jerge, Otanǵa degen qurmetiniń artýy, Táýelsizdigimizdiń nyǵaıýyna yqpal etýi», dedi Memlekettik hatshy.
Otyrysta Joǵarǵy sottyń Jambyl, Almaty jáne Pavlodar oblystary ákimdikteriniń memlekettik rámizderdi paıdalaný, qoldaný jáne nasıhattaý jónindegi esepteri tyńdaldy. Sondaı-aq Joǵarǵy sottyń Sottardyń qyzmetin qamtamasyz etý departamentiniń basshysy Nurserik Sháripov elimizdiń zańdarynda memlekettik rámizderdi zańsyz paıdalanǵany, qorlaǵany úshin ákimshilik jáne qylmystyq jaýapkershilik kózdelgenin, osy baǵytta sot praktıkasyn halyqqa durys túsindirý máselesin Joǵarǵy sot nazarda ustap otyrǵanyn aıtyp ótti.
«Esterińizde bolsa, byltyr memlekettik týdy páterine zańsyz ildi degen jeleýmen Qyzylorda oblysynyń turǵyny jaýapqa tartylǵan bolatyn. Sóıtip oǵan 450 myń teńgeden astam aıyppul salyndy. Árıne bul is el ishinde rezonans týdyrdy. Joǵarǵy sot isti qaraı kele, atalǵan azamattyń áreketinen zań buzýshylyq tappady. Sebebi memlekettik týdy úıge ilip qoıý degen tártip áli kúnge deıin reglamenttelmegen», dedi Nurserik Sháripov. Onyń aıtýynsha, Joǵarǵy sot atalǵan jaǵdaıdy eskere otyryp, memlekettik rámizderdi qoldaný boıynsha arnaıy qaǵıda qajet ekenin usynyp, Úkimetke hat joldaǵan.
Jıyn sońynda 2019 jylǵa arnalǵan jumys jospary bekitildi. G.Ábdiqalyqova memlekettik organdar basshylaryna memlekettik rámizderdi paıdalaný, qoldaný jáne nasıhattaý boıynsha naqty tapsyrmalar berdi.
Aqmaral AǴZAMQYZY,
«Egemen Qazaqstan»
