Operasııalyq zaldy aralaý kezinde Baqytjan Saǵyntaevqa jumyspen qamtý ortalyǵynyń jańartylǵan ofısi ótken jyldyń qazan aıynda paıdalanýǵa berilgeni málimdeldi. Ǵımarat qajetti tehnıkalyq quraldarmen jabdyqtalǵan, elektrondy kezek júıesi engizilip, elektrondyq eńbek bırjasynyń jumysymen biriktirilgen. E-bırja portalynda búgingi tańda jumys berýshiler sany 73%-ǵa ulǵaıtylǵan, qyzmetterdi alý ýaqyty 20%-ǵa qysqartylǵan, azamattardy jumysqa ornalastyrý boıynsha Ortalyqtyń qyzmetkerleri múmkindikterin 31%-ǵa keńeıtken, portal arqyly jumys izdeýshiler tarapynan bos jumys oryndaryna suranys 15%-ǵa artty. Jalpy respýblıka boıynsha 2018 jyldyń III toqsanynda eńbektiń elektrondy bırjasynda 255 843 bos jumys oryndary men 121 557 túıindeme ornalastyrylǵan.
Jumyspen qamtý ortalyǵynyń negizgi mindeti — qyzmet alýshylardyń ýaqytyly ári sapaly áleýmettik qyzmetter alýyna qajetti jaǵdaılardy jasaý. Jumyspen qamtý ortalyǵynyń dırektory E. Keńesbekov bıylǵy 1 qyrkúıektegi jaǵdaı boıynsha 8125 júginýshige qajetti qyzmetter usynylǵanyn aıtty. Olardyń ishinde: jumys izdeýshilerdi tirkeý; jumyspen qamtýǵa járdemdesýdiń belsendi sharalaryna baǵyt berý; jańa formattaǵy «ataýly áleýmettik kómekti» taǵaıyndaý úshin keńes berý jáne qujattardy qabyldaý; О́nimdi jumyspen qamtý jáne jappaı kásipkerlikti damytý baǵdarlamasyn iske asyrý máseleleri boıynsha keńes berý.
О́ńirde 11 jumyspen qamtý ortalyǵy jumys isteıdi. Oblys ákiminiń birinshi orynbasary B. Orynbekovtyń aıtýynsha, sońǵy on aıda 20 978 adam jumysqa ornalasqan, 4964 adam qoǵamdyq jumysqa tartylyp, 4 169 adam bilimi men biliktiligin arttyrǵan. 6586 jańa jumys orny qurylǵan, onyń ishinde 4898 — turaqty, 1688 — ýaqytsha jumys orny bar. Kásibı oqytýshylardyń jalpy sany 2999 adam qysqa merzimdi kásibı oqytýdan ótip, onyń 1361-i jumysqa ornalasty.
